Rusiye kontrolindeki Qırım Yuqarı mahkemesi Qırımda Rusiye mahkemesi qıdıruvğa ilân etmege qarar bergen eski siyasiy mabüs Edem Bekirovnıñ imayesi bergen istinaf şikâyetini baqacaq. Mahkeme oturışuvı iyülniñ 13-nde ötkerilmeli. Bu aqta Bekirovnıñ advokatı Aleksey Ladin Facebookta bildirdi.
«Hatırlatayım, FSB onı 14 kilogramm patlayıcı madde ve silâ saqlağanında ve bergeninde saçma bir şekilde qabaatlağan edi, 1-inci derece saqatı SİZOda tutuldı, lâkin 2019 senesi sentâbrniñ 7-nde Edem Bekirov 24 tutulğan deñizci ve daa 10 siyasiy mabüsnen beraber Ukrainağa büyük «deñişüv» neticesinde qaytıp oldı. Aqmescitniñ Merkeziy mahkeme qadısı Bekirovnıñ Aqmescitte olmağanına «şaşıp», onı qıdıruvğa ilân etti. Qarar şikâyet etildi», – dep yazdı Ladin.
Mayısnıñ 14-nde Kreml kontrolindeki Aqmescitniñ Merkeziy rayon mahkemesi 2019 senesi sentâbr ayında Ukraina ve Rusiye arasında tutulğan şahıslarnı deñişüv neticesinde SİZOdan azat etilgen qırımtatar faali Edem Bekirovnıñ cinaiy davasını yañıdan baqıp başladı. Daa soñra aynı mahkeme faalni mahkemege «zornen ketirmege» qarar berdi. Mayısnıñ 22-nde prokurornıñ muracaatınen qadı Bekirovnı qıdıruvğa ilân etmege qarar aldı.
Edem Bekirovnıñ fikirince, Qırımda yañıdan başlatılğan mahkeme esnası ve qıdıruvğa ilân etilüvi qabaatlayıcı ükümnen yekünlenecek.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi. Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
Kyivdeki Rusiye elçihanesi Ukraina tarafından azat etilgenlerniñ fotoresimini derc etti, amma anda aytılğan 35 insandan tek 24-ü bar. Rusiyege teslim etilgenlerniñ resmiy cedveli alâ daa yoq. Rusiyege MH17 uçaq seferiniñ davasında şübheli Vladimir Tsemah ve «RİA Novosti Ukraina» baş muarriri Kirill Vışinskiy teslim etilgeni belli.