Çarşenbe künü, dekabrniñ 18-inde, Birleşken Milletler Teşkilâtınıñ Baş Assambleyasınıñ oturışı keçecek, anda ilhaq etilgen Qırımda insan aqlarınıñ qorçalavına dair rezolütsiya leyhası baqılacaq. Bunı Ukrainanıñ BMT-nda missiyasınıñ Twitter saifesinde bildireler.
Oturış saat 11:00 başlanacaq. Rezolütsiya qabul olunsa, o birden amelge keçecek.
🔴#HeadsUp #Crimea #UNTomorrow, December 18, #UNGA to consider a draft resolution seeking the protection of the human rights in the occupied #Crimea.Tune in 11AM ET to follow live 📺 https://t.co/wtfGCZCC9H.These are the core elements of the draft resolution 👇 pic.twitter.com/NYty6yfjY6
— UKR Mission to UN (@UKRinUN) December 17, 2019
"Adet üzre Baş Assambleya Yañı Yılnıñ ögünde rezolütsiya leyhalarını BMT-nıñ resmiy vesiqasına çevire. Dekabrniñ 18-inde Qırım yarımadasındaki insan aqlarnıñ qorçalavı aqqında ukrain rezolütsiya leyhası boyunca rey berüv keçecek", - dep BMT-nda Ukrainanıñ vekilliginiñ spikeri Oleg Nikolenko daa evel bildire edi.
Daa evel Ukraina Tış işler nazirligi, işğal etilgen Qırımda ukrain ve qırımtatarlarnıñ aqları «daima bozula», dep bildirdi. Müessise, «al-azırda Qırımda sahte qabaatlavlar boyunca eñ azından 35 qırımtatarı tutuldı», dep qayd etti.
Rusiye Tış işler naziri Sergey Lavrov, noyabrniñ 27-nde işğal etilgen Qırımda insan aqlarınıñ bozuluvına dair laflar uydurıla, dep bildirdi.
Gaagadaki BM halqara mahkemesi Rusiyege Kyiv Moskvanı Ukraina şarqında terrorizmni maliye etkeninde ve Qırımda ırq ayırım yapqanında qabaatlağan Ukraina davasına cevap olaraq vesiqa azırlaması içün 2020 senesi dekabrniñ 8-ne qadar vaqıt berdi.
Ukraina, 2017 senesi dava açtırdı. Kyiv, Rusiye Donbastaki aydutlarğa qoltutıp, Terrorizmni maliye etüv ile küreş şartnamesini ve, işğal etilgen Qırımda qırımtatarlarğa ve ukrainlerge basqı yapıp, ırq ayırımınıñ bütün şekillerini yoq etüv şartnamesini boza, dep ayta. 2019 senesi iyün ayında BM Halqara mahkemesi dava diñlevlerine başlağan edi.
Noyabrniñ 14-nde BM Baş assambleyasınıñ Üçünci komiteti Qırımda Rusiye işğali şaraitlerinde insan aqlarını qoruv qararını qabul etti.
Daa evel Birleşken milletler baş kâtip Antoniu Guterrişniñ işğal etilgen Qırımda bozulğan insan aqlarına dair birinci maruzasını aydınlattı. Maruzanıñ metni teşkilâtnıñ saytında derc etildi.