2019 senesi Rusiye işğal etken Qırımdaki insan aqları vaziyeti fenalaşmağa devam etti, dep aytıla dekabrniñ 13-nde aydınlatılğan Avropa komissiyasınıñ Ukrainanıñ AB ile assotsiatsiya añlaşmasını uyğunlaşuv maruzasında, dep haber ete «Ukrinform» ukrain haber resursı.
Maruzada qayd etilgeni kibi, 2018 senesi olğanı kibi Qırımda Rusiye akimiyetine tirengen şahıslarğa qarşı sistematik repressiyalar yapıla.
Bundan ğayrı, qırımtatarlarnı apiske almağa, qorqutmağa ve taqip etmege devam eteler. Esas aqlar, hususan tasil aqqınıñ bozuluvı qayd etildi.
Avropa Birligi, Ukraina ükümeti kontrol etmegen Donbas topraqlarında esas serbestliklerniñ bozuluvları, öldürüv, qanunsız apis cezaları, cınsiyet sebebinden zorbalıq, işkence, mal-mülk aqlarınıñ bozuluvları olğanını qayd ete. Kütleviy haber vastaları, din ve iman serbestligi de bu topraqlarda sert bir şekilde bozula, dep aytıla maruzada.
Malüm olğanı kibi, BM Baş Assambleyasında dekabrniñ 18-nde Qırım yarımadasında insan aqlarını qoruv qararınıñ ukrain leyhasına rey berecekler.
Daa evel Ukraina Tış işler nazirligi, işğal etilgen Qırımda ukrain ve qırımtatarlarnıñ aqları «daima bozula», dep bildirdi. Müessise, «al-azırda Qırımda sahte qabaatlavlar boyunca eñ azından 35 qırımtatarı tutuldı», dep qayd etti.
Rusiye Tış işler naziri Sergey Lavrov, noyabrniñ 27-nde işğal etilgen Qırımda insan aqlarınıñ bozuluvına dair laflar uydurıla, dep bildirdi.
Gaagadaki BM halqara mahkemesi Rusiyege Kyiv Moskvanı Ukraina şarqında terrorizmni maliye etkeninde ve Qırımda ırq ayırım yapqanında qabaatlağan Ukraina davasına cevap olaraq vesiqa azırlaması içün 2020 senesi dekabrniñ 8-ne qadar vaqıt berdi.
Ukraina, 2017 senesi dava açtırdı. Kyiv, Rusiye Donbastaki aydutlarğa qoltutıp, Terrorizmni maliye etüv ile küreş şartnamesini ve, işğal etilgen Qırımda qırımtatarlarğa ve ukrainlerge basqı yapıp, ırq ayırımınıñ bütün şekillerini yoq etüv şartnamesini boza, dep ayta. 2019 senesi iyün ayında BM Halqara mahkemesi dava diñlevlerine başlağan edi.
Noyabrniñ 14-nde BM Baş assambleyasınıñ Üçünci komiteti Qırımda Rusiye işğali şaraitlerinde insan aqlarını qoruv qararını qabul etti.
Daa evel Birleşken milletler baş kâtip Antoniu Guterrişniñ işğal etilgen Qırımda bozulğan insan aqlarına dair birinci maruzasını aydınlattı. Maruzanıñ metni teşkilâtnıñ saytında derc etildi.
