Aqyarda iyülniñ 20-nde saba 13 yañı COVID-19 hastası qayd etildi. Şeerniñ Rusiye ükümetiniñ matbuat hızmeti bildirgenine köre, hastalar arasında 5,7 ve 11 yaşında üç bala, 16 yaşında genç ve dört qart adam bar.
«Eki hasta Aqyarğa diger regionlardan keldi, qalğanları daa evel hastalanğanlarnen alâqada olğan edi», – dep aytıla haberde.
Qayd etilgenine köre, yahşı olğan daa bir kişi hastahaneden çıqarıldı. Umumen yılnıñ başından Aqyarda 305 insan koronavirus yuqunçına oğradı. Al-azırda 51 insan hastahanede buluna. 239 kişi yahşı oldı, 6 insan vefat etti.
«Bugünki künde şeerniñ yuqunç hastahanesinde 110 insan közetile, №9 şeer hastahanesinde 140 kişi buluna. 727 insan yaşağan yerinde közetile», – dep aytıla haberde.
«İzumrud» ve «Solnışko» yerli raatlıq evleri observator rejiminde çalışa.
Keçken künü Qırımda 14 yañı koronavirus hastası qayd etildi. Rusiye kontrolindeki Yalta memuriyetiniñ yedi hadimi de koronavirus yuqunçına oğradı.
Yerli akimiyetniñ malümatına köre, umumen 983 yañı koronavirus hastası qayd etildi. 63-ü çetelden keldi, 105-i qomşu Rusiyeden kelgenler ve olarnen alâqada olğanlar. 672 hasta tibbiy yardım içün muracaat etkende ve hastalarnen alâqada olğanından qayd etildi, 108 hasta sağlam insannıñ skriningi neticesinde belli oldı. 721 insan yahşı oldı, 13 kişi koronavirustan vefat etti. Aqyarda 292 insan koronavirus yuqunçına oğradı, 283 insan tüzeldi, 6 kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.