Rusiye kontrolindeki Yalta memuriyetiniñ yedi hadimi koronavirus yuqunçına oğradı. Bu aqta iyülniñ 20-nde memuriyet saytında haber etile.
Qayd etilgenine köre, bu hadimler «birinci hastalanğan kişinen alâqada oldı ve Aqmescitniñ 7-nci şeer hastahanesine alındı».
«Yaltanıñ yuqunç bölüginde bu mevsimde olğan hastalar tedaviylene. Sağlıq vaziyetleri yahşı. Geer memuriyeti Rospotrebnadzor bölüginen beraber hastalıq tarqaluvına yol bermemek içün profilaktika tedbirlerini keçirdi. Hadimlerniñ büyük qısmı uzaqtan çalışacaq, alâqada olması mümkün olğan insanlar tibbiy közetüv altına alındı», – dep işandıra şeer akimiyeti.
Haber etilgenine köre, regionda bir sıra qoşma qarar qabul etildi. Olarğa köre, regionnıñ müessise bölükleri ve territoril organlarınıñ işi içün sıñırlav tedbirlerine riayet etecek qaideler bar.
Memuriyet, dezinfektsiya ve maska taquv rejimine riayet etile, sıcaq baqıla, mesafe tutula, kütleviy tedbirlerniñ keçirilüvi sıñırlana, vatandaşlar sıñırlı qabul etile ve uzaqtan işke keçirile, dep işandıra.
Keçken künü Qırımda 14 yañı koronavirus hastası qayd etildi. Yerli akimiyetniñ malümatına köre, umumen 983 yañı koronavirus hastası qayd etildi. 63-ü çetelden keldi, 105-i qomşu Rusiyeden kelgenler ve olarnen alâqada olğanlar. 672 hasta tibbiy yardım içün muracaat etkende ve hastalarnen alâqada olğanından qayd etildi, 108 hasta sağlam insannıñ skriningi neticesinde belli oldı. 721 insan yahşı oldı, 13 kişi koronavirustan vefat etti. Aqyarda 292 insan koronavirus yuqunçına oğradı, 283 insan tüzeldi, 6 kişi vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
