Avgustnıñ 2-sinde Rostov-na-Donu (Rusiye) şeerinde Şimaliy Kavkaz bölgesiniñ arbiy mahkemesinde, terrocılıqta qabaatlanğan cemaat jurnalisti Nariman Memedeminovnıñ davası boyunca mahkeme oturışında, onıñ YouTube kanalından videolarnı tetqiq ettiler. Bunı Qırım.Aqiqatqa tefsir bererek, advokat Emil Kurtbedinov aytıp berdi.
"Narimannıñ YouTube kanalından onğa yaqın video yazılarnı baqıp çıqtılar. Bu videolarnı dört kategoriyağa bölmek mümkün. Lâdiniy, yani dinge ait olmağan bayramlar ve İslâmnıñ olarğa munasebeti aqqında videolar. Ekinci kategoriya - musulmanlarnıñ taqibatınen ve "Hizb ut-Tahrir" davalarınen bağlı mevzulı videolar. Üçüncisi - Qırımda mitingler ve islâm bayramları aqqında ve akimiyet olarnı yasaqlamağa tırışqanı aqqında video yazılar. Dırtüncisi ise tarihiy mevzularğa ait, anda Nariman, Halifat ve Osman Devleti dağılması ve Qırımnıñ XVIII asırda ilhaqı aqqında aytıp bere", - dep añlattı advokat.
Kurbedinov, bu videolarda terrorcılıqqa çağıruv yoq, dep saya.
"Anda qanunğa qarşı bir şey yoq. Adamnıñ, islâmiy noqta-i nazardan dünyağa bağmağa aqqı bar. Ve biz bugün baqqan malümatnıñ terrorcılıq propagandasına iç alâqası yoq. Bu - musulman blogeriniñ sade videoları", - dedi o.
Advokatnıñ fikrince, tahqiqat, müşterisiniñ qabaatlavını doğru hasiyetlemey.
"Bu misalde Rusiyede terorristik sayılğan "Hizb ut-Tahrir"ge aitlik aqqında Rusiye CK-niñ 205 maddesi daa "lâyıq" körüne, çünki Nariman bu teşkilât aqqında çoq ayta. Amma, kene de, üçünci şahıs adından, teşkilât azası kibi degil", - qoştı Kurbedinov.
Ristov-na-Donu Rusiye şeerinde Ukraina baş konsulı Taras Malışevskiy, SİZOda terrorcılıq propagandasında qabaatlanğan qırımtatar blogeri Nariman Memedeminovnı ziyaret etti.
2018 senesi martnıñ 22-nde Bağçasaray rayonında Rusiye telükesizlik hadimleri ve uquq qoruyıcıları Nariman Memedeminovnıñ evini tinttiler. Ondan soñ faaliyetçi Aqmescitteki Rusiye FSBsi idaresine alıp ketildi. Martnıñ 23-nde mahkeme Memedeminovnı tevqif etti.
Memedeminovnı Rusiye CK-nıñ 205 maddesiniñ 2-nci qısmına ait olğan cinayette (İnternet vastasınen terrosistik areketlerge açıq çağıruvlar) qabaatlaylar.
Martnıñ 23-nde QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.