Ağır hasta qırımtatar faali Edem Bekirov Aqmescit SİZOsında bir aftadan çoq kerekli ilâclarını almay. Bu aqta öz Twitter saifesinde vaqtınca Ukraina Sağlıq naziriniñ vazifesi becergen Ulâna Suprun yazdı.
Suprun, qırımtatar faaliniñ “şeker koması” ihtimalı kün-künden artqanını Bekirovnıñ tuvğanlarınıñ sözlerinden bildire. Bekirovnıñ ayağı kesilgen, onıñ 1-inci gruppa saqatlığı ve bir qaç ağır hastalığı bar.
Важко хворий український політв’язень Едем Бекіров більше тижня не отримує медикаментів. Він незаконно утримується Росією у СІЗО Симферополя. За словами родичів Едема, вірогідність «цукрової коми» зростає щодня. #FreeBekirov pic.twitter.com/NtoPVlV2pg
— Уляна Супрун (@usuprun) 28 квітня 2019 р.
Rusiye kontrolindeki Qırım Yuqarı mahkemesi qırımtatar faali Edem Bekirovnıñ SİZOda tutuluv müddetiniñ uzatılmasına berilgen imayeniñ temyiz arizasını red etti. Edem Bekirov iyünniñ 12-ne qadar nezaret altında qalacaq.
Advokat İslâm Velilâyevniñ aytqanına köre, mabüsniñ sağlıq vaziyeti daa beter oldı.
Ukraina Yuqarı Radasınıñ insan aqları vekâletlisi Lüdmila Denisova Bekirov tibbiy teşkerüvge yollanmalı, dep bildirgen edi. Tibbiy teşkerüvden soñ berilgen insulin iñektsiyaları sebebinden allergiyası olğan edi.
Rusiye kontrolindeki Aqmescitniñ Kiyev rayon mahkemesi silâ ve patlayıcı maddelerni saqlağanında qabaatlanğan Bekirovnıñ tevqif müddetini eki ayğa uzattı.
Your browser doesn’t support HTML5
«Aqayım dayanır, o, küçlüdir». Edem Bekirovnıñ ömür arqadaşı onıñ apiske alınması aqqında (video)
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.