Aqyardaki «Hizb ut-Tahrir davasınıñ» ekinci mabüsi Nuri Primov qomşu Rusiyeniñ Mariy El Cumhuriyetindeki Rusiye koloniyasından azatlıqqa çıqtı.
Bu aqta advokat Rustem Kâmilev Qırım.Aqiqat mühbirine bildirdi.
«Nuriniñ alı yahşı, er şey güzel. Şimdi apishane urbasını deñiştirsin dep, oña qıyafet alamız. Qırımda tintüv vaqtında alınğan bütün vesiqalar, pasport ve diplomlarını oña qaytardılar. Yarın evde olacağına ümüt etemiz», – dep bildirdi advokat.
Kâmilevniñ qayd etkenine köre, Nuri Primov koloniyadan çıqqan soñ olarnı, tahminlerge köre, FSB hadimleri ozğara: «Şimdi şeerde dolaşamız ve taqip etilgenimizni farq etemiz. Kimse yanımızğa kelmey, qayda barğanımızğa baqalar. Koloniya ögünde «Rossiya 24» kanalınıñ jurnalistleri bar edi, elbette, kimse izaat bermege razı olmadı».
Bundan evel Aqyardaki «Hizb ut-Tahrir davasınıñ» mabüsi Rustem Vaitov Rusiye apishanesinden azatlıqqa çıqtı, dep haber etildi.
2016 senesi sentâbr ayında Rostov-na-Donu şeeriniñ Şimaliy-Kavkaz okrugınıñ arbiy mahkemesi qararını seslendirip, «Hizb ut-Tahrir davası» boyunca qabaatlanğan aqyarlılar Ferat Sayfullayev, Rustem Vaitov ve Nuri Primovnı beş yıl umumiy rejim koloniyasında qalmalarına üküm etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.