Rusiye nezaretinde olğan Aqmescitniñ Kiyev rayon mahkemesi Arsen Ahtemovnı sentâbrniñ 4-nde Aqmescitteki Rusiye FSBsiniñ binası ögünde toplaşuv vaqtında saniatr qaidelerni bozğanı içün 15 biñ ruble para cezasına mahküm etti.
Bunı "Qırım birdemligi" Facebook saifesinde haber etti.
Qayd etilgeni kibi, Arsen qardaşı Asannıñ ğayıp olğanını bilgen soñ FSB binasına ketkenini ayttı. Babası da anda edi. Onıñ sözlerine köre, başta çoq adam yoq edi, amma er kes maska kiyip içtimaiy mesafpege riayet ete edi. FSB hadimleri toplanğanlarnı "yüksek seviyeli azırlıq rejiminiñ sıñırlavları" aqqında tenbi etken. OMON hadisleri ile kelgen avtozaklarnı körip, Arsen Ahtemov anda ketmege qarar etken. Amma binadan 200 metr uzaqta olğan zaman, onı barıp tutqanlar ve yerge yatqızğanlar.
Bundan soñ Arsen Ahtemovnı ve babası Eskender ağanı 15 künge tehqiqat tevqifhanesine qapattılar.
Neticede Arsen Ahtemovğa 15 biñ ruble para cezası berildi.
"Böyle qarar olacağını evelden bile edim, şunıñ içün iç şaşmadım. Delilleri yoq edi, çünki dava materiallarındaki fotoresimlerde men yoq edim. Prokuror, protokol tizgenleri kelmedi", - dedi Ahtemov.
Advokat Safiye Şabanova Aqmescit civarındaki "gaz borusında diversiya yapqanından" şübheli sayılıp apiske alınğan Asan Ahtemovnı "zorbalıq izlerini gizlemek" içün karantinde tutular tutalar, dep saya.
Advokat Ayder Azamatovnıñ bildirgenine köre, Aqmescit civarındaki "gaz borusında diversiya yapqanından" şübheli sayğan Asan Ahtemovnıñ karatinge yollanması, onıñ iskencelerge oğratılmasını tasdıqlaycaq tibbiy baqınuvdan keçmesini müşkülleştire bile.
Qırımda «gaz borusında diversiya yapqanından» şübheli sayılıp apiske alınğan qırımtatarı Asan Ahtemovğa qarşı qabaatlav sertleştirildi. Bundan Ahtemov onı tutıp, birden aqımnen işkence ettiler, dep bildirdi.
Advokatı Ayder Azamatov Qırımda «gaz borusındaki diversiya yapqanından» şübheli sayılıp apiske alınğan Asan Ahtemovnıñ ağrıları bar ve nefesi tutula, dep bildirdi.
Rusiye quvetçileri «diversiya davası» mabüsleriniñ advokatları bergen malümatnı açıq şekilde tefsir etmey. Qırım.Aqiqat, apiske alınğan qırımtatar faallerine qarşı FSB tarafından yapılğan işkencelernen bağlı informatsion muracaatnı FSBge yolladı.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.