İyül 25-inde kündüz Aqmescit (Simferopol) ava limanına acele qaytqan uçaqnıñ yolcuları, baracaq noqtası - Sankt-Peterburgğa uçıp çıqtı. Bu aqta ava limanınıñ matbuat hızmetine esaslanıp, "Krıminform" matbuatı yazmaqta.
"Bugün kündüz tehnikiy bozuqlıqlar sebebinden ava limanına qaytqan WZ-786 uçağınıñ (Aqmescit - Sankt-Peterburg) yolcuları, Sankt-Peterburğa uçıp çıqtı", - dep bildireler matbuat hızmetinde.
WZ-786 Aqmescit - Sankt-peterburg uçuşını becergen Red Wings avia şirketiniñ A-320 uçağı, Qırim paytahtından 13:40-ta çıqtı. Köterilüv vaqtında, komandir şassi toplanmağanını bildirdi, bunıñ içün ava limanına qaytmağa qarar berdi. 14:27-de uçaq Aqmescit ava limanında qondı, qonuv yahşı keçti, yolculardan kimse zararlanmadı.
Qonmadan soñ yolcularğa birden suvuq içimlikler teklif etildi, soñra ise sıcaq aş da berildi. İstegenlerni musafirhanege yerleştirdiler.