Yolcu uçağı qaza sebebinden Aqmescit ava limanında qonmağa azırlana, dep bildirdi ava areketi idaresiniñ organlarındaki menba «İnterfaks» agentligine.
«Komandir şassi toplanmağanını bildirdi. Qonmağa azırlanalar», – dep aytıla haberde.
TASS malümatına köre, laf Airbus A320 uçağı aqqında kete. Uçaqta 135 insandan ziyade buluna.
Yanğın-qurtaruv bölükleri ava limanına yol aldı.
Ava limanınıñ saytında bunı tasdıqlaycaq resmiy malümat daa yoq.
2018 senesi aprelniñ 16-nda Aqmescitte Rusiye akimiyeti ava limanınıñ yañı terminalını açtı. Onı 22 ay içinde aman-aman 32 mlrd ruble (13 mlrd ğrıvnâ – QA) sarf etip qurğanlar.
Ukraina Qırım üzerindeki ava boşluğından mesüliyetli olğan devlet olaraq Rusiyeniñ Qırım işğalinden soñ onıñ uçaq areketlerini ve ava limanlarını qapattı. Anda ve andan kerçekleştirilgen uçaq seferleri Ukraina ve halqara qaidelerini boza. Daa soñra Qara deñiz üzerindeki bazı yollar vatandaş aviatsiyası içün kene açılğan edi. Rusiye ava şirketleri yasaqqa baqmadan, halqara uquqnı bozıp, ilhaq etilgen Qırımğa uçmağa devam ete.
