Türkiyeniñ paytahtı Ankarada mayısnıñ 18-nde qırımtatar sürgünliginiñ 75 yılına bağışlanğan hatıra mitingi keçirildi. Aktsiyada biñge yaqın insan iştirak etti, dep bildire Ukrinform haber agentligi.
«Tam 75 yıl evelsi totalitar sovet kommunist rejimi insaniyetlilikke qarşı cinayet kerçekleştirdi – genotsid, buña başqa bir ad bermek mümkün degil… Ne yazıq ki, bizler tarihnıñ bu facialı saifeleri tekrarlanğanını kene köremiz. 2014 senesi istilâcı Rusiye Qırımnı işğal etken soñ. Qırımtatar halqı taqipniñ esas obyekti ola», – dedi Ukrainanıñ Türkiye Fevqulâde ve Vekâletli elçisi Andriy Sıbiğa.
Aktsiya teşkilâtçısı Namık Kemal Bayar sürgünlikni körgen biñlernen insannıñ mezar yerleri alâ daa belli degil, dep qayd etti.
«Halqnı yoq etip olamadılar. Yıllar devamında qırımtatarlar sıq-sıq canlarını feda etip, kimligi oğrunda küreşmege, rejimlerge qarşı çıqmağa mecbur edi», – dep qayd etti o.
Haber agentliginiñ malümatına köre, aktsiya iştirakçileriniñ «Rusiye, Qırımdan ceennemni al», «Sürgünlikniñ 75 yılı» yazuvlı şiarları bar edi, olar «Qırım – Vatanımızdır», «Qırımdaki zorbalıq toqtatılsın» dep şiarlar seslendirdi.
Miting iştirakçileri Qırımdaki adise-vaqialarnı da hatırlap, Rusiyeden yarımadanı azat etmesine ve yarımadanıñ tamır halqlarına qarşı qanunsız areketlerni toqtatmasına çağırdı.
Mitingden soñ Ankara camilerinden birinde sürgünlik qurbanları içün dualar oquldı.
Mayısnıñ 18-de Ukraina ve dünyada 1944 senesinde qırımtatar halqınıñ Qırımdan sürgün etilmesi qurbanlarını hatırlaylar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Şu künü qırımtatarlar halqınıñ Qırımdan sürgün etilüviniñ qurbanları hatırasına çeşit añma tedbirleri keçirile.
Ukraina Yuqarı Radasınıñ qararına binaen, mayıs 18 künü Qırımtatar halqınıñ genotsidi qurbanlarınıñ hatıra künü dep ilân etildi.