AB tış siyaset hızmetiniñ resmiy vekili Peter Stano Rusiyeni halqara uquqnı bozıp, mahküm etken bütün qırımtatarlarnı azat etmesine çağırdı. Bu aqta o, Twitter saifesinde yazdı.
Stano, Avropa Birliginiñ Rusiye temsilciliginden zenaatdaşı Yaltadaki «Hizb ut-Tahrir davasınıñ» tünevinki mahkemesinde bar edi ve Emir-Usein Kukunı acele aşçat etmege çağırdı, dep qayd etti.
«Rusiye qırımtatarlarnı ve aq qorçalayıcılarnı taqip etmege devam ete. AB Rusiye temsilciliginden memur Emir-Usein Kukunıñ bugünki (mayısnıñ 26-nda – QA) mahkemesinde bar edi. Avropa Birligi onı ve Qırımda halqara qanunlarğa zıt bir şekilde üküm etilgen bütün insanlarnı acele ve şartsız azat etmege çağıra. Qırım – Ukrainadır», – dep aytıla haberde.
Emir-Usein Kuku – qırımtatar aq qorçalayıcısı ve faali. 2019 senesi noyabrniñ 12-nde Rusiyeniñ Cenübiy okrugınıñ arbiy mahkemesi onı «terror teşkilâtınıñ faaliyetini teşkil etkeninde» qabaatlap, 12 yılğa üküm etti. Amnesty International Kukunı vicdan mabüsi dep saya.
ABD Ukraina elçihanesi Rusiyeni Emir-Usein Kukunı apisten azat etmesine çağırdı.
Büyük Britaniyanıñ Ukraina elçisi Melinda Simmons ve Britaniya parlamentiniñ azası Wendy Morton da Rusiyeni ukrainalı siyasiy mabüslerni, hususan Emir-Usein Kukunı azat etmesine çağırdı.
«Memorial» aq qorçalayıcı merkezi Emir-Usein Kukunı siyasiy mabüs dep tanıdı.
Your browser doesn’t support HTML5
«Erte ya da keç adalet yeñecek» – Emir-Üsein Kukunıñ oğlu (video)
Rostov-na-Donu Cenübiy okrugı arbiy mahkemesiniñ qararınen Muslim Aliyev 19 yılğa, İnver Bekirov 18 yılğa, Emir-Usein Kuku 12 yılğa, Vadim Siruk 12 yılğa, Arsen Cepparov 7 yılğa ve Refat Alimov 8 yılğa üküm etildi.
Amnesty International aq qorçalayıcı teşkilâtı Yaltadaki «Hizb ut-Tahrir davasınıñ» bütün mabüslerini vicdan mabüsi dep adlandırdı.
Ukraina Tış işler nazirligi bu üküm sebebinden Rusiyege narazılıq bildirdi.
Bu dava boyunca qabaatlanğanlar 2016 senesi fevral-aprel aylarında Yaltada tutulğan edi. Olarnı Rusiyede yasaqlanğan «Hizb ut-Tahrir» islâm siyasiy teşkilâtına alâqaları bar olğanında qabaatlaylar.
«Memorial» Rusiye aq qorçalayıcı merkezi beş qırımlını siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.