Avgustnıñ 30-nda Ukrainadaki Avropa Birliginiñ delegatsiyası Rusiyeni Qırımdaki mecburiy ğayıp olmalarnı tahqiq etmege çağırdı. Bunıñ aqqında delegatsiyanıñ Twitter saifesinde yazıla.
«Bugün Mecburiy ğayıp olamalarnıñ qurbanları halqara künü qaıd etile. Biz Rusiyeni Qırımda tutulğan bütün siyasiy mabüslerni azat etmege, faallerniñ ğayıp olmalarını tahqiq etmege çağıramız. Rusiye qanunsız işğalni toqtat», – dep yazıla bildirmede.
Ukraina akimiyeti Rusiyeni ilhaq etilgen Qırımda mecburiy ğayıp olmalar içün mesüliyetke celp etmek maqsadınen halqara ortaqlarnen çalışmağa devam ete. Bunı Halqara mecburiy ğayıp olmalar kününide Ukraina TİN birinci muavini Emine Ceppar hatırlattı.
Kyivde avgustnıñ 30-nda Mecburiy ğayıp olmalarnıñ qurbanları kününde «15 hırsızlanğan ömür» adlı sergi açıldı.
İyülniñ 26-nda QırımSOS cemaat teşkilâtınıñ faalleri Kyivdeki Rusiye elçiligi yanında işğal etilgen Qırımda mecburiy ğayıp olğanlarnıñ ve olarnıñ tuvğanlarınıñ destegine 60-ncı aktsiya keçirdiler - «Ne vaqıt qaytacaqsız...».
Qırım ilhaqından soñ yarımadada insanlar, hususan qırımtatarlar, sıq-sıq qaçırılmağa başladı. Rusiye Taqiqat komitetiniñ Qırım idaresi, «yarımadada qırımtatarlarnıñ kütleviy ğayıp olması» qayd etilmey, dep israr ete.
Prezidentniñ Qırımdaki temsilciligi bir haber alınmağan ğayıp olğan qırımlılarnıñ cedvelini de derc etti: Valeriy Vaşçuk, İvan Bondarets, Vasiliy Çernış, Timur Şaymardanov, Seyran Zinedinov, İslâm Cepparov, Cevdet İslâmov, Eskender Apselâmov, Fedor Köstenko, Muhtar Arislanov, Arlen Terehov, Ruslan Ganiyev, Arsen Aliyev, Eskender İbraimov ve Ervin İbragimov.