Ukraina akimiyeti Rusiyeni ilhaq etilgen Qırımda mecburiy ğayıp olmalar içün mesüliyetke celp etmek maqsadınen halqara ortaqlarnen çalışmağa devam ete. Bunı Halqara mecburiy ğayıp olmalar kününide Ukraina TİN birinci muavini Emine Ceppar hatırlattı.
«Ukraina halqra ortaqları ve Qırım platforması iştirakçileri ile ilhaq etilgen Qırımda mecburiy ğayıp olmalar içün Rusiyeni mesüliyetke celp etmek maqsadınen halqara ortaqlarnen çalışmağa devam etecek», – Ukraina TİN matbuat hızmeti Cepparnıñ aytqanlarından alıntı ketire.
Ukraina nazirliginde, ilhaqnıñ devamında Qırımda eñ azından 44 insan ğayıp olğanını, olarnıñ arasında 15-niñ taqdiri aqqında iç bir şey belli olmağanını hatırlattı.
«Bu insanlarnıñ çoqusı işğalge qarşı çıqqan Ukraina tarafdarı falleridir», – dep yazıla bildirmede.
Ukraina TİN, Qırım MC Prokuraturası 112 cinayet davası açılğanını da qayd ettiler.
«Rusiye Federatsiyasından işğalci devlet olaraq halqara gumanitar uquqqaa ve halqara insan aqlarına binaen mucburiyetlerine riayet etmesini talap etemiz», – dep qayd ettiler TİN-de.
İyülniñ 26-nda QırımSOS cemaat teşkilâtınıñ faalleri Kyivdeki Rusiye elçiligi yanında işğal etilgen Qırımda mecburiy ğayıp olğanlarnıñ ve olarnıñ tuvğanlarınıñ destegine 60-ncı aktsiya keçirdiler - «Ne vaqıt qaytacaqsız...».
Qırım ilhaqından soñ yarımadada insanlar, hususan qırımtatarlar, sıq-sıq qaçırılmağa başladı. Rusiye Taqiqat komitetiniñ Qırım idaresi, «yarımadada qırımtatarlarnıñ kütleviy ğayıp olması» qayd etilmey, dep israr ete.
Prezidentniñ Qırımdaki temsilciligi bir haber alınmağan ğayıp olğan qırımlılarnıñ cedvelini de derc etti: Valeriy Vaşçuk, İvan Bondarets, Vasiliy Çernış, Timur Şaymardanov, Seyran Zinedinov, İslâm Cepparov, Cevdet İslâmov, Eskender Apselâmov, Fedor Köstenko, Muhtar Arislanov, Arlen Terehov, Ruslan Ganiyev, Arsen Aliyev, Eskender İbraimov ve Ervin İbragimov.
