QIRIM – Soñki vaqıtları Rusiye media segmentinde hususan Rusiye tarafdarı qırımlı blogerlerniñ yardımınen Qırımtatar Milliy Meclisini itibardan tüşürüv ıntıluvları körüne. Qırım.Aqiqat, qırımtatar halqınıñ temsiliy organına yapılğan bu media ücümi nenen bağlı olğanını añlamağa istedi.
İyülniñ 28-nde «RİA Novosti» Ukrayına telükesizlik hızmetiniñ Herson vilâyetinde «Ukrayınanıñ qırımtatar halqı ögündeki qabaatı ne» serlevalı maqaleni azırlanmasına alâqası bar dep malümat derc etti, maqaleniñ maqsadı, aytılğanına köre, Meclis «liderleriniñ tesirini eksiltmektir». «RİA Novosti» bildirgenine köre, bu maqaleniñ sebebi Meclis reberliginiñ 2020 senesi mayısnıñ 2-nde «Dünya zorbalıq ve işğalge qarşı. İtibar yürüşi» halqara barışıq zorbalıqsız aktsiyasını» keçirüv niyeti oldı.
«Qırım» batalyonınıñ komandanı İsa Akayevniñ fikirince, bu maqale ve Meclisni itibardan tüşürüv ıntıluvları Rusiye akimiyetiniñ qırımtatarlar Qırımda barışıq tirenüvinden arbiy tirenüvge keçeceginden qorqqanınen bağlı.
Qırımtatarlar Qırımnı faal sürette azat eteceklerİsa Akayev
«Mence, añlağanları içün faaller: vaqıt kelse ve halqnıñ temsiliy organından bir işaret berilse, qırımtatarlar Qırımnı faal sürette azat etecekler», – dep izaatladı Qırım.Aqiqatqa komandan.
İsa Akayev, «Qırım» batalyonınıñ komandanı
Rusiyeniñ Qırımtatar Milliy Meclisiniñ reberligi ve azalarını itibardan tüşürüv ıntıluvlarına Rusiye tarafdarı blogerler ve Qırımdaki satqınlar qoşuldı.
«Meclis» leyhası er şeyni – Vatan, halq, tuvğanları ve yaqınlarını satqan yaqın safdaşlarınen beraber cemaat-siyasiy yaşayışnıñ çetinde bir şeyler ayta, unutılıp kete», – dep ayttı Telegram kanalında Eyvaz Umerov.
Qırımnıñ paytahtında Meclis binası da diqqatsız qalmadı.
«Aqmescitniñ tam merkezinde yıllar devamında Ukrayına zamanlarından yasaqlanğan meclis (Qırımtatar Milliy Meclisi Qırım işğalinden soñ 2016 senesi Rusiye tarafından yasaqlandı – QA) binası baqılmay ve viran ola. Onı semereli qullanmağa imkân yoqmı? Milletlerara razılıq merkezi, genç medeniyet mektebi, qabiliyetli balalar institutı. Bir sıra variant bar. Şeer ve regionnı inkişaf ettirecek yañı reberler taqımını azırlamaq içün qullanmaq mümkün», – dep teklif etti Rusiye tarafdarı bloger ve cemaatçı Viktor Popov.
Qırımnın Rusiye akimiyeti zapt etken Qırımtatar Milliy Meclisiniñ binası, 2020 senesi fevral ayı
Qırımdaki Euromaydan aktsiyalarınıñ teşkilâtçılarından biri, Qırım Ukrayınleri Şurasınıñ vekili, «Krımska svitlıtsâ» gazetasınıñ baş muarriri Andriy Şçekun emin ki, Meclis liderleriniñ faalligi Kremlniñ siñirine tiye.
İnformatsion ceetten Rusiye Ukrayına içün küreşni yuttura. Neticede – Kremlden rusiyeli blogerlerge faaliyetlerini quvetleştirüv emirleri kele.Andriy Şçekun
«Qırımlı ve rusiyeli blogerlerniñ Mecliske qarşı artqan menfiy köntenti menim içün yañı bir şey degil. Birinciden, Rusiye Meclis faaliyetini yasaqladı, Halqara mahkemeniñ bu qararnı lâğu etmek kerek olğanına dair qararı da bar. Bu yasaqnıñ temelinde vaqtında işğal etilgen Qırımdan ketken Meclis vekilleriniñ faaliyeti ola, olar Qırımnı işğalden azat etüv, qırımtatar halqınıñ aq ve serbestligini halqara seviyede qoruv meselelerinde faal olmağa devam eteler. Bu Ukrayınanıñ istilâcı devletke qarşı cemaat-siyasiy tarafını quvetleştire. İnformatsion ceetten Rusiye Ukrayına içün küreşni yuttura. Neticede – Kremlden rusiyeli blogerlerge faaliyetlerini quvetleştirüv emirleri kele. Olar ise malümat alıp, kirli işlerini başlatalar. Bu jurnalistika olmay – raşist propagandasını yapqan bir sekta», – dep ayttı fikrini cemaatçı Qırım.Aqiqatqa.
Andriy Şçekun, «Krımska svitlıtsâ» gazetasınıñ baş muarriri
Qırımtatar Milliy Meclisiniñ reis muavini İlmi Umerovnıñ fikirince, Viktor Popovnıñ teklifi Qırımnıñ Rusiye akimiyeti tarafından qabul etilmeycek.
«Qırımdaki akimiyeti teklif etilgen variantlarğa cesaret etip olamaz. Onı bunıñ içün qurmadılar. Onıñ temeli itiqat olğan ve er yerde propagandası yapılğan eki mif ola. Ruslarnıñ milliy üstünligi ve yeñilmez olğanı: er kes Rusiyege suqlana, er kes oña ücüm etmege istey, Rusiye ise er kesten küçlü ve diger memleketlerde bile ruslarnı qorçalamağa azır. Amma bunı hucur bir şekilde yapa. Başqasınıñ toprağını arbiy yolnen işğal ete, bütün müim obyektlerni zapt ete ya da yoq ete, tez-tez «rus dünyasınıñ» bütün «güzelliklerinen» Rusiye akimiyetini tikley», – dep tüşüne Meclis reisiniñ muavini.
İlmi Umerov, Qırımtatar Milliy Meclisiniñ reis muavini
İlmi Umerov qayd etkenine köre, «rus dünyası» qoltutmağanlarnı sevmey.
Qoltutmağanlar aman-aman birden qayd etile ve olarğa qarşı sert repressiyalar başlatıla. İnsanlarnı hırsızlap tutalar, kötekley ve işkencege oğratalarİlmi Umerov
«Tarafdarlarını Rusiyege alıp, anda yerleşmege yardım etmek yerine «rus dünyasınıñ» hızmetçileri yüz biñlernen insannı zapt etilgen yerlerge faal sürette yerleştire. Olarnı da «banderler çekiştirsin» dep, ğaliba. Qoltutmağanlar aman-aman birden qayd etile ve olarğa qarşı sert repressiyalar başlatıla. İnsanlarnı hırsızlap tutalar, kötekley ve işkencege oğratalar. Bunı esasen resmiy olmağan quvet teşkilâtları yapa, olar yağmurdan soñ mantar kibi tez çıqa. İstilâcınıñ yapa bilgeni bu qadar. Rusiye tarafdarı cemaatçınıñ leyhaları çoqusı rusiyeli içün añlaşılmay. Loqsahaneden başlap bala başlıqlarını pilotkağa, mektep derslerini ise «Zarnitsağa» deñiştirmek daa kolay. «Rus dünyasınıñ» ealisini böyle şekillendirmek daa semereli», – dep qayd etti Umerov.
Qırımtatar Milliy Meclisiniñ reisi Refat Çubarov ve qırımtatarlarnıñ milliy lideri Mustafa Cemilev «Qırım platformasınıñ» açılışında, 2021 senesi avgustnıñ 23-ü
Ukrayına prezidentiniñ Qırım Muhtar Cumhuriyetindeki daimiy vekili Tamila Taşevanıñ malümatına köre, Ukrayına cenübindeki vaqtınca işğal etilgen topraqlarda FSB Meclisnen bağlı şahıslarnı qıdıra.
«[Rusiyeliler] kelgende Meclis, 2015 senesi Qırımnıñ vatandaş qamaçavına alâqası olğan ya da ATO veteranları olğan qırımtatarlarnıñ evlerini dolaşıp başladı. Olar [işğalciler] insanlarnı qısmen tutıp, Qırımğa çıqarıp başladı», – dep haber etti Taşeva.
Tamila Taşeva, Ukrayına prezidentiniñ Qırım Muhtar Cumhuriyetindeki daimiy vekili
Tamila Taşevanıñ fikirince, Rusiye başlatqan Ukrayınağa qarşı büyük cenk Qırımnıñ işğalden azat etilüvinen yekünlenmeli.
SEE ALSO: «Tamır halqlarnıñ Qırımdaki aqları Moskvanı qorquza»MALÜMAT: Ukrayınağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayına şimalinde faal olğanını toqtattı, dep bildirdi. Tezden Ukrayına akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayınağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.