Qırım ve Aqyardaki Rusiye Tahqiqat komitetiniñ idaresi Aqmescit civarındaki Mamaq (Stroganovka) köyünde 3 yaşında Musa Suleymanovnıñ coyulması sebebinden cinaiy dava açtı.
«Bugün kündüz saat 4-lerde Mamaq köyünde yaşağan oğlançıq ve tatası kezmege çıqqanlar. Bir kereden qızçıq onı körip olamadı», – dep aytıla haberde.
Müessise, adise yerinde Qırımdaki Tahqiqat komitetiniñ yolbaşçısı Vladimir Terentyevniñ reberligi altında tahqiqatçılar çalışa, dep bildire.
Daa evel berilgen malümatqa köre, balanı qıdırmaq içün Rusiye politsiyasınıñ hadimleri, kinologlar, Qırımdaki Rusiye Fevqulâde vaziyetler nazirliginiñ vekilleri ve «Liza Alert» teşkilâtınıñ göñüllileri celp etildi.
Coyulğan oğlançıq – cemaat jurnalisti, Aqmescitteki ekinci «Hizb ut-Tahrir davasınıñ» mabüsi Ruslan Suleymanovnıñ oğludır.