2014 senesiniñ martından soñ Qırımda tintüvler sıq-sıq keçken şeyler oldı. «Azatlıq aqqı» programmasınıñ keçken yayınında Qırım.Aqiqat Radiosınıñ efirinde advokat Nikolay Polozov, eviñizge tintüv yapmaq içün kelseler özüñizni nasıl tutmaq keregiñizge dair tevsiyeler berdi. Bu mevzunıñ devamı olaraq o, tintüv vaqtında eviñizge, çetten ketirip, yasaq bir şey qoysalar, ne yapmaq keregiñizni, nege aqqıñız olğanını ve nege diqqat etmek keregiñizni añlata.
Advokat, tintüv vaqtında eviñizde bir de-bir yasaq etilgen eşya tapılsa, ve siz onıñ sizge ait olmağanını tam olaraq bilseñiz, nasıl adımlar atmaq keregiñizni añlata.
İç bir taqdirde, iç biz vaziyette bu eşyanı eliñizge almañız
Adliyeci: «Evelâ, iç bir taqdirde, iç biz vaziyette bu eşyanı eliñizge almañız. Ekincisi, bu eşyanıñ sizin qarşıñızda deral ava yibermegen bir paket ya da mektüp zarfı içine qoyulmasını ve tahqiqatçı tarafından muürlenip imzalanmasını talap etiñiz. Üçüncisi, bu eşyanıñ üstünde el izleriñizniñ olıp olmağanını teşkerecek daktiloskopik ekspertizanıñ keçirilmesini talap etiñiz», – dey.
Polozovnıñ aytqanına köre, bu eşyanı bir de-bir operativ hadimniñ qolunda körseñiz, bu operativ hadimniñ ceblerinden materiallar ve mikroparçaçıqlarnıñ alınması içün resmen muracaat ete bilirsiñiz.
Nikolay Polozov
Aq-uquq qorçalayıcısı: «Bundan ğayrı, iç bir vaqıt bu eşyanı özüñizinki olaraq tanımağa razı olmañız, ve bu eşyanıñ muayen şahıs tarafından muayen şaraitte tapılğanını protokolda mutlaqa qayd etiñiz. Daa soñra bu, advokatqa mahkemede bu tahqiqat areketine qarşı şikâyet bermege yardım etecek», – dep devam ete.
Bu eşyanıñ muayen şahıs tarafından muayen şaraitte tapılğanını protokolda mutlaqa qayd etiñiz
Nikolay Polozovnıñ tevsiyelerinden şöyle bir netice çıqa ki, evinde tintüv yapılğan insan tahqiqatçığa seyfler, qapalı odalar ve ilâhre açmaq mecbur degil. Lâkin tahqiqatçı olarnı özü aça bilecegini unutmamalı. Bu esnada qanun, tahqiqatçıdan bu şeyler ve predmetlerge mümkün qadar az zarar ketirilmesini talap ete.
Advokat: «Ondan ğayrı, sizde yasaq etilgen eşyalar tapılsa, yaqalana bilecegiñizni añlamaq kereksiñiz. Bu sebepten, sizge yaqın vaqıtta tintüv ile keleceklerini añlasañız, evelâ, advokatnen, ya da daa yahşısı – devlet advokatı ile degil de, işanğan advokatlarıñıznen bağıñız olmaq kerek. İkincisi, yaqalanuvdan soñ sizge birinci vaqıtta kerek olacaq eşyalar taqımıñız azır olmaq kerek: deñiştirmek içün urba taqımı, iç urbası, şahsiy gigiyena eşyaları», – dep, özüñizni böyle vaqialarğa nasıl azırlamaq keregiñizni añlata.
Meclis reisiniñ muavini Ahtem Çiygoznıñ evinde yapılğan tintüvniñ neticeleri. 2015 senesi yanvar 30 künü
Advokat, aqılda tutulması kerek olğan hususlarğa diqqat ete:
– tintüv vaqtında advokatnıñ yardımından faydalanmağa;
– tintüv vaqtında bulunmaq ve tintüv iştirakçileriniñ areketlerini közetmege;
– Rusiye Anayasasınıñ 51-nci maddesi boyunca özüñizge ve yaqın aqrabalarıñızğa qarşı şaatlıq etmemege;
– aynı madde boyunca tahqiqatçığa elektron tertibatlarıñıznıñ parollerini bildirmemek;
– tintüv vaqtında tapılğan şahsiy ve aile ayatıñıznıñ tafsilâtlarını halqqa bildirmemekni talap etmege;
– musadere etilecek predmetlerniñ sizge kösterilmesini talap etmege;
– protokolğa qaydlarıñıznı yazmağa;
– tintüv protokolınıñ kopiyasını almağa aqqıñız bar.
Advokat: «Ondan ğayrı qanun tahqiqatçı, operativ hadim ve tintüv keçirgen şahıslarğa tütün içmek, bağırmaq, divarlar ve töşemeni eşip bozmaq ve ilâhre yasaq ete. Bu sebepten sizde, tintüv esnasında bu şahıslardan tertipniñ kütülmesini talap etmege aqqıñız bar. İç bir boş yapraqnı imzamamaq pek muimdir. Ve imzalaycaq vesiqañızda er bir boş grafası ya toldurılğan, ya da üstünden sızılğan olmaq kerek», – dep qayd etti.