Oktâbrniñ 11-nde, çarşenbe künü, saba Bağçasarayda rus silâlı hızmetçileri, işğal etilgen yarımadada öz tanışlarına destek bildirmek içün çeşit aktsiyalarda defalarca iştirak etken qırımtatarları, musulmanlarını tintken. Bunı oktâbrniñ 11-nde Facebook saifesinde qırımtatar milliy areket faili Nariman Celâl izaatladı.
«Bügünki tintüvler sadece nevbetteki sözde «terroristlerniñ» degil de, defalarca çeşit vaziyetlerde, «Qırım birdemligi» çerçivesinde çeşit merasimlerde iştirak etken, bu kibi tintüvlerge oğrağan adamlarğa destek bildirgen, olarğa maddiy ve maneviy yardım bergen şahıslarnıñ evlerinde ötkerildi», – dep qayd etti Celâl.
Şimdiki vaziyetni o sadece «hayaliy terrorizmge qarşı küreş» kibi degil de, tamam Qırımdaki taqiplerge itiraz bildirgen «razı olmağanlarğa qarşı devletniñ siyasiy küreşi» olaraq tanıy.
Celâlnıñ sözlerine köre, silâlı hızmetçiler pek qaba davranğan, tintilgen evlerge advokatlarnı yibermegen, protokollarnıñ kopiya nushasını qaldırmağan, adamlarnı evlerge yaqın qoymağan.
«Soñki vaqıtları bu kibi tintüvler vaqıtında rus silâlı hızmetleri, destek bildirmege ya da olıp keçken adiselerden haber almağa kelgen adamlarnı bir-de-bir areketlerge tarik etmege ıntılğanlarını qayd ettik», – dedi Celâl.
O dey ki, Bağçasaraydaki tintüvler vaqıtında «silâlılar tarik etüvni becergenler», neticede dava yüz berdi ve tintilgen adamnıñ tanışları ve soy-sopları tevqif etilgen.
Onıñ fikirine köre, bu kibi areketler soñ da devam etecek.
Oktâbrniñ 11-nde, çarşenbe künü, saba Bağçasarayda rus silâlı hızmetleri bir-qaç qırımtatarınıñ, musulmannıñ evinde tintüv keçirgeni malüm oldı.
Rus haber vastaları, Rusiye Federal telükesizlik hızmetiniñ (FSB) matbuat hızmetine atıf etip, Qırımda silâlı hızmetler Rusiyede ve onıñ işğaline oğrağan Qırımda yasaq etilgen«Hizb ut-Tahrir» teşkilâtınıñ Bağçasaraydaki üceyresini yoq etkenlerini haber etti.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı dep saya. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleridir.
«Hizb ut-Tahrir» halqara islâm siyasiy teşkilâtı bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek oğrunda terroristik usullarnı red ete ve Rusiyede adaletsizce taqip etilgenini aytalar. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etken edi.