Qırımtatar Qurultayınıñ Merkeziy saylav komissiyasınıñ reisi Zair Smedlâyev Rusiyege boysunğan Qırım Yuqarı mahkemesi aprel 25-te keçirilecek toplaşuvda Meclis faaliyetini yasaq etecek, dep belley. Bu aqta Zair Smedlâyev bir kün ögüne Facebook saifesinde yazdı.
«Yarın, aprel 25-te saat 9:30-da Aqmescitte, Pavlenko, 2 adresi boyunca Qırımtatar Milliy Meclisniñ ekstremistik teşkilâtı olaraq tanılması ve onıñ faaliyetiniñ Rusiye Federatsiyası territoriyasında yasaq etilmesi boyunca nevbetteki mahkeme toplaşuvı keçirilecek. Fikirimce, Poklonskaya ve Rusiye Federatsiyası Adliye nazirliginiñ qararına binaen onı ekstremistik teşkilâtı olaraq tanımaq qararını çıqaracaqlar! Qanunğa yuğan yolnen degil, yani birinciden meseleni ogrenip, soñ qarar almaq degil de, aksine, qararnı almaq içüñ endi qanunsız qabul etilgen qararlar stimul olacaqtır!» – qayd etti o.
Zair Smedlayev böyle qararnıñ qabul etilecek taqdirde onı «siyasiy sımarış» dep adlandıra.
Aprel 13-te Kreml tarafından tayin etilgen Qırım prokurorı Natalya Poklonskaya Qırımtatar halqınıñ Meclisi faaliyetiniñ mahkeme qararına qadar toqtatılması aqqında qarar alğanını bildirdi. Aprel 15-te Qırımda Meclisni yasaq etmesi davası boyunca nevbetteki mahkeme toplaşuvı keçirildi, nevbetteki toplaşuvnı aprel 25-te keçirmek qararı alındı.
Aprel 18-de Rusiye Adliye nazirligi Qırımtatar Meclisini «ekstremist faaliyetinden sebep» yasaq etilgen teşkilâtlar cedveline kirsetti. Böyle qarar Ukraina, bir sıra halqara teşkilâtlar ve uquq qoruyıcılar tarafından takbih etildi.
Rusiye prezidentiniñ matbuat kâtibi Dmitriy Peskov yarımadada Qırımtatar Milliy Meclisiniñ yasaq etilmesi meselesi «Rusiyeniñ içki işi» olğanını, ve Rusiye tıştan kelgen «tevsiyelerni» diñlemeycegini ilân etti.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.