Türkiye prezidenti Rusiye arbiy uçaqları memleketniñ ava boşluğını tekrar bozsa, onıñ memleketi cevap berecegini ve Moskva Ankaranı dost olaraq ğayıp etecegini ayttı. NATO bildirgenine köre, Rusiye tarafından yapılğan bozuvlar tesaduf degildir. Kreml ise eki memleketniñ işbirligi devam etecegine ümüt ete.
Türkiye prezidenti Recep Tayip Erdoğan hatırlata ki, onıñ memleketi-NATO azasına ücüm etilse, bütün Şimaliy atlantik ittifağına ücüm etildi kibi sayılacaq. O, Brüssel ziyareti devamında qomşu Suriyedeki kampaniyada iştirak etken Rusiye arbiy uçaqları tarafından onıñ memleketiniñ ava boşluğı bozulğanını qayd etip, ileride böyle bir şeyge yol berilmeycegini aydınlattı.
Rusiye bir sıra meselede iş tutqan Türkiye kibi dostunı coysa, o, bir çoq şeyden marum qalacaq, bunı añlamaq kerekRecep Tayip Erdoğan
«Rusiye bir sıra meselede iş tutqan Türkiye kibi dostunı coysa, o, bir çoq şeyden marum qalacaq, bunı añlamaq kerek», – dep tenbiyeledi Türkiye devlet yolvaşçısı.
Kremlde Rusiye prezidentiniñ vekili Dmitriy Peskov bunıñnen bağlı adise eki memleketniñ işbirligine, şu cümleden «Türk aqımı» gaz borusınıñ qurulmasına, zarar ketirmeycek dep ümüt etkenini bildirdi.
NATO Rusiyeniñ aqlamalarına inanmay
Türkiye ve NATO cumaertesi ve bazar künleri Rusiye aviatsiyası tarafından eñ azından eki kere bozuv yapılğanını bildireler.
Rusiye yalıñız bir bozuvnı qabul etti, ekincisi, Moskvanıñ bildirgenine köre, daa taqiq etile. Rusiye arbiyleri o kün «ava yaramay» edi (aynı o kün, oktâbr 3-te, Rusiye devlet televideniyesi Suriyede ava bombardıman etmek içün uyğun olğanını bildirgen edi), dep aytalar. Rusiye bu bozuv bir qaç saniye sürgenini bildire. Bu vaqiadan sebep bazarertesi künü acele toplaşuvnı keçirgen NATO ittifağı bunı red ete. NATO baş kâtibi Jens Stoltenberg bu bozuvlarnıñ mevzusına qaytıp bunı dedi: «Bizim içün tesaduf bir şey degil. Ava boşluğınıñ ciddiy bozuvıdır – raatlıq künleri eki bozuv oldı, bu tesaduf olmağanını isbatlağan bir fakttır. Avropanıñ diger yerlerinde olıp keçken bozuvlarğa köre, bular devamlı sürdi, biz buña pek ciddiy yanaşamız».
Rusiye Suriyede kimni ura?
Stoltenberg Rusiye «İslâm devleti» ekstremistik gruppirovkasını degil de, Suriye prezidenti Başar Asadnıñ rejimi içün esas telüke olğan Suriye muhalifeti, em de vatandaşlar ealisini urğanını tahmin ete. Böyle malümatlar kün-künden arta. Moskva Suriyege kirişkeniniñ maqsadı «İslâm devletine» qarşı areketler olğanını bildirgen edi.
AQŞ da aynı qasevetler olğanını ilân etti. Devlet departamentiniñ vekili Josh Earnest dey ki, Washington Rusiye Suriyede muhalifet gruppalarını ayırmağanını köre, Moskva «İslâm devletini» uramız dep aytsa da, olarnıñ darbeleri «İslâm devletiniñ» küçleri aman-aman yoq ya da iç olmağan yerlerge endirile.
Rusiyeniñ taktikası da, strategiyasını da şübe altına qoymaq içün bir sıra sebep bar, menim fikirimce, bu areketler neticesinde Rusiye etraftaki müitten daa çoq ayırılacaqJosh Earnest
«Rusiyeniñ taktikası da, strategiyasını da şübe altına qoymaq içün bir sıra sebep bar, menim fikirimce, bu areketler neticesinde Rusiye etraftaki müitten daa çoq ayırılacaq, ya da Suriyeniñ musulman ealisini ve Rusiyeniñ musulman ealisini açuvlandıracaq», – dep tenbiyeledi Devlet departamentiniñ vekili.
Amma Rusiyede Mudafaa naziri Anatoliy Antonov darbe endirmeden evel Rusiye istihbarat ve Suriye ordularınıñ ve kâinat, ava istihbaratınıñ malümatlarını talil etkenini bildire. «Nişanğa uracağımıznı yüz fayız bilip, darbe endiremiz», – dep ayttı o.
Metnniñ asıl nushası – Radio Svoboda saytında