Kiyev – Bazarertesi künü, fevral 23-te, Rusiye Federatsiyasınıñ Kiyevdeki elçihanesiniñ binası yanında Qırımnıñ işğaline qarşı onıñ yıllığı munasebeti ile piket ötkerildi. Aktsiyanıñ teşkilâtçıları – Qırımnı mecburen terk etken faaller deyler ki, olıp keçken piket işğalge qarşı informatsion kampaniyanıñ birinci basamağıdır. Onıñ çerçivesinde tögerek masalar, aktsiyalar, fleşmob ve fevral 28-de Mustaqillik meydanında keçirilmesi planlaştırılğan miting ötkerilmeli.
Rusiye elçihanesi yanında keçirilgen pikette Qırım cemaat faalleri, uquq qorçalayıcıları, köçip kelgenler, em de Qırım işğali meselesine lâqayt qalmağan Kiyev sakinleri iştirak ettiler.
«Meni dostlarım çağırdı. Men Qırım – Ukraina olğanına qoltutam. Men Qırımnı ve yahşı tabiat ve güzel insanlar ile bağlı Ukrainanıñ diger yerlerini sevem», – dep añlattı pikette iştirak etüviniñ sebeplerini Kiyev sakini İgor Sıtıy.
İştirakçilerniñ qollarında «Putin, Lavrov, Surkov buña işğal, istilâ deyler», «Rusiyeniñ Qırımı – yalan, Qırım – menim Vatanım» levhaları bar edi. Rusiye elçihanesiniñ qorasında piket iştirakçileri Rusiye askerleriniñ yarımadağa kirüvini tasvir etken fotoresimlerni yerleştirdiler. «Almenda» Grajdanlarnıñ maarifi merkeziniñ yolbaşçısı Olga Skripnikniñ aytqanına köre, fotoserginiñ maqsadı keçken sene Rusiyeniñ yarımadağa qarşı istilâsını köstermek edi.
Olga Skripnik
«Bir yıl evelsi Aqyarda Qırımda memuriy binalarnıñ zapt etilmesini başlatqan miting olıp keçken edi. Birinci zaptlar Aqyarda, soñra ise Aqmescitte oldı. Müimi şu ki, fotoresimlerde körgeniñiz kibi, binalarnı vatandaşlarnıñ yardımı ile degil, silâlı adamlarnıñ – «yeşil adamçıqlarnıñ» – yardımı ile zapt etken ediler», – dep ayttı Skripnik jurnalistlerge.
Piketke bir qaç on insan toplaştı. Evromaydan-Krım areketiniñ koordinatorı Andrey Şçekun dedi ki, tedbir yalıñız informatsion piket olğanı içün çoq adam kelmedi, lâkin fevral 28-de Mustaqillik meydanında kütleviy miting keçirilecek, anda daa çoq insan olacaqtır.
«Bizler aktsiyalarımıznı fotosergi ile başlaymız. Fevral 28-de Maydanda Qırım sakinleri ve Ukrainanıñ diger region sakinleri iştirak etecek büyük aktsiya keçirilecek. Mart 10-da Ukraina Nazirler şurasında tögerek masa ötkerilecek. Soñra bizler «Qırım» fraktsiyalarara birleşmesi ile bir qaç aktsiyanı keçirmege planlaştıramız», – dep ayttı faal.
Şçekunnıñ bildirgenine köre, cemaat kampaniyanıñ maqsatlarından biri Ukrainanıñ haber toplulığında Qırım işğali meselesiniñ aydınlatmaması ile küreş ola.
Your browser doesn’t support HTML5
Kiyevde Qırım işğaline qarşı piket
Eki piket birleşti
Elçihane yolunıñ qarşısında «Svoi» cemaat ağınıñ iştirakçileri Ukrainanıñ Yuqarı mahsus mahkemesi yanında piket ötkerdiler. Qırımlılarnıñ aktsiyası soñuna yetkende soqaqnıñ qarşısında piket ötkergenler yarımada işğaline qarşı aktsiyağa qoşuldılar. Arbiy urbağa kiyingen aman-aman elli insan yoldan keçip, Qırım işğaline qarşı şiarlarnı seslendirmege başladılar.
İnformatsion kampaniyanıñ çerçivesinde faaller «Qırım – Ukrainadır» Twitter aktsiyasını keçireler. Teşkilâtçılar içtimaiy ağlarnıñ qullanıcılarını #CrimeaisUkraine tegi ile haberlerni qoymağa çağıralar.
Fevral 23-te yarımada işğali aqqında yalıñız cemaat faalleri degil, prezident Petro Poroşenko da ayttı. Devlet yolbaşçısınıñ saytında onıñ Ukraina halqına Qırım vaqialarınıñ birinci yıllığı ile bağlı beyanatı yerleştirildi. Qırım işğali yıllığında Ukraina prezidenti Petro Poroşenko ukrain devleti Rusiye tarafından işğal etilgen yarımadanı qaytarmağa devam etecegini bildirdi. Qırımda bir yıl evelsi yüz bergen vaqialarnı ve «referendumnı» Poroşenko «Rusiyeniñ Ukrainağa qarşı açıq istilâsını gizlemek içün yapılğan bir areket» olaraq adladı. Onıñ qayd etkenine köre, Ukraina Qırım aqqından iç bir vaqıt vazgeçmeycek, ve vaqtınca işğal etilgen topraqlarda Ukraina nezareti ğayrıdan tiklenecek. Yarımada akimiyeti birden cevap berdi. Qırımnıñ öz başına ilân etilgen baş naziri Sergey Aksenovnıñ fikirince, prezident Petro Poroşenko ile yolbaşçılığında Ukraina akimiyeti mahkeme etilmek kerek. O, Kiyevge Qırım qaytarılması ile bağlı «hayal qurmamağa» tevsiye etti.
Bir yıl evelsi – 2014 senesi fevral 23-te Qırımda Rusiye Federatsiyası tarafından yapılğan yarımada işğaliniñ birinci vaqiaları olıp keçti. Bu kün Aqyarda Rusiye bayraqları altında büyük miting olıp keçken edi, anda şeerniñ yañı yolbaşçısı olaraq Rusiye vatandaşı olğan yerli iş adamı Aleksey Çalıy ilân etildi.
Aynı vaqıtta Aqmescitte Qırımtatar Milliy Meclisi teşkil etken kütleviy miting olıp keçti. Onıñ iştirakçileri Ukraina Yuqarı Radasından Qırım parlamentiniñ dağıtılmasını talap etip, Qırım Muhtar Cumhuriyetiniñ yañı Anayasasını qabul etmek içün işke başlamağa çağırdılar. Bu kün aqşam Sergey Aksenovnıñ «Russkoye yedinstvo» firqası Qırım şeerinde nevbetçilik yapacaq «cemaat nizamı imayesiniñ on taqımınıñ» meydanğa ketirilmesini ilân etti.