Lvov – «KrımSOS» cemaat teşebbüsiniñ esasçılarından biri, «Ukrainskaya pravda» onlayn-neşiriniñ baş muarriri Sevgil Musayeva-Borovik Lvov sakinlerine «göñülli sürgünlik», Qırım qaramanları ve yarımadanıñ Ukraina nezareti altına qaytarılması aqqında tarif etti.
Memleketniñ şarqında yüz bergen adise-vaqialardan soñ Qırım Ukrainanıñ informatsion saasından ğayıp oldı, lâkin yarımadanıñ bugünki vaziyeti aqqında susmaq mümkün degil, – eminliknen ayta Sevgil Musayeva-Borovik. «Sentâbr ayında menim tuvğan Qırımda lâqayt qaldırmağan esnaslar başladı. Qırımtatarlarnıñ ekseriyeti yerli saylavlarnı körmemezlikke urğan soñ adamlar ğayıp olmağa başladı», – dedi «Ukrainskaya pravda» neşirniñ baş muarriri.
Onıñ aytqanına köre, böyle etip akimiyet «Qırım saipleri kim olğanını» kösterecek ola.
«Erkekni bir de bir binada asılğan alda tapqanlarını eşitseñ, qabaatlılarnı tapmaycaqlarını añlaysıñ. Ve añlaysıñ ki, seniñ semetdeşlerinden 20 kişi ğayıp oldı. Bunıñ maqsadı ne sualine cevap peyda ola. Bunı bizler qorqıp, eşyalarnı toplayıq ve göñülli sürgünlik olsun dep, yapalar», – dep tüşüne Musayeva-Borovik.
Jurnalistniñ zanınca, işğal etilgen Qırımda qalğan adamlar qurban olıp qala. «Çünki anda yalıñız faal olğan insanlar ğayıp olmay, muhalifet olmağan ve adiy adamlar da ğayıp ola», – dep añlata o.
«Olar Qırımda ukrain faktorı olıp qalalar. Aqmescitte Euromaidannıñ faal iştirakçisi olğan bir tanışım, Qırımdan ne sebepten ketmeysiñ sualime, biz ketsek, yarımada Ukrainağa nasıl qaytacaq, dep cevaplandı», – dey Sevgil bazı qırımlılarnıñ fikirlerini aydınlatıp.
Jurnalist qayd ete ki, yarımadada razı olmağanlar bar. «Qırım akimiyeti ise Qırımnı «rus aleminiñ» qoruğına çevirecek ola, er kes buña razı olğanını ve Qırım – Rusiye dep tüşüngenini kösterecek ola», – dedi Musayeva Qırım akimiyetiniñ areketleri aqqında.
Qırım ne vaqıt qaytacaq?
«Ukrainskaya pravda» neşiriniñ yañı muarririnden Qırım ne zaman qaytacağını sıq-sıq soraylar. «Mence, Qırım meselesi – qırımtatarlar ve umumen Ukraina içün bir çağıruvdır. Qırımtatarlarnıñ müim vazifesi – bir olmaq ve bir halq olğanımıznıñ duyğusını saqlamaqtır. Ve farqlı gruppalarğa bölünmemek», – dep qayd ete jurnalist.
Musayeva-Borovikniñ fikirince, bütün ukrainlilerniñ problemi susmaqtan ibarettir. «Bizler turmuş işlerinen meşğul edik. Bizler kerek olğanı qadar faal olmadıq, aqlarımız içün küreşmedik. 2010 senesi Yanukoviçni akimiyetke kirsetmemek kerek edi, lâkin biz buña yol berip, 2014 senesi bunıñ neticesi ne olacağını añladıq. Memleketimizde sağ qalmaq – devamlı bir esnastır, onıñ artından bizler diger problemlerge emiyet bermedik», – dep yazıqsına «Ukrainskaya pravda» neşiriniñ baş muarriri.
Jurnalistniñ fikirince, yarımadanı qaytaruv meselesini çezmek içün ukrainler akimiyetke bağlı olmasından vazgeçmeli. «Şimdi bazıları akimiyet Qırımnı unuttı deyler, digerleri – unutmadı. Maña köre, bu paternalizmden vazgeçmeli», – dep ayta Musayeva-Borovik.
Onıñ bildirgenine köre, ukrain ve qırımtatarlar er zaman olarnı kelip qurtaracaq bir liderge ümüt eteler. «Lâkin bu yañlıştır. Şimdi Ukrainada inkişaf etken faaller areketi ileride memleketni şekillendirecek vatandaşlar cemiyetiniñ bir qısmı olacaq. Ve Qırım bizim toprağımız olacaqmı-yoqmı bizim istegimizge bağlı. Qırımnı qaytarmaq istegimiz olsa, o, mıtlaqa qaytacaq», – dedi Musayeva-Borovik.
«Qırımtatarlarnıñ cemaat-siyasiy esnasları: tünevin, bugün, yarın» lektsiyası dekabr 12-de İlk Lvov mediatekasında «Qırımtatarlar kimler?» interaktiv lektsiyaları çerçivesinde keçirildi.
Tedbir teşkilâtçıları – «KrımSOS» cemaat teşebbüsi ve Ukrainadaki Avropa Şurasınıñ Ofisi.
Your browser doesn’t support HTML5
Севгиль Мусаева про возвращение Крыма