Avropa parlamenti Rusiyede tutulğan ukrainalı rejissör Oleg Sentsovnıñ «eñ lâyıq namzetini» Saharov mukâfatına sayladı. Böyle bir fikirni Ukraina halq deputatı, Qırımtatar Milliy Meclisiniñ reisi Refat Çubarov Radio Svobodada seslendirdi.
Çubarovnıñ aytqanına köre, bunı o, Avropa parlamentiniñ Litvaniya deputatı Pâtras Auştrâviçüske bildirdi. O, «Avropa parlamenti içinde Sentsovnıñ mukâfat alması içün keçirilgen kampaniyanıñ eñ faal «areketçilerinden» biri edi.
«Bu Oleg Sentsovnıñ apisten azat etilmesine yardım etermi? Mence, Rusiye bir qarar alsa bile, bu müim bir faktor olmaycaq, Birleşken Ğarp tarafından belli bir uzlaşma kerek olacaq», – dedi Refat Çubarov.
Oktâbrniñ 25-nde Rusiyede mahküm etilgen ukrainalı rejissör Oleg Sentsov Avropa parlamentiniñ «İfade serbestligi içün» Saharov mukâfatına nail oldı. Taqdirlev merasimi dekabrniñ 12-nde Strasburgda olacaqtır.
Ukraina prezidenti Petro Poroşenko Rusiyede mahküm etilgen ukrainalı rejissör Oleg Sentsovğa Saharov mukâfatını bermege qarar alğan Avropa parlamentine teşekkürler bildirdi. Ukraina devlet yolbaşçısınıñ aytqanına köre, Sentsov printsipial küreşniñ, işançlarğa sadaqat örnegi ola.
1988 senesinden berli Avropa parlamenti Saharov mukâfatını insan aqları ve ifade serbestligini qorçalağan insan ve teşkilâtlarğa bere.
Oktâbrniñ 5-nde Rusiye apishanesiniñ nezaretçileri bildirdi ki, 145 künden berli açlıq tutqan Sentsov «aşamağa razı olğanını yazma şekilde» bildirdi. Sentsov, Rusiye apishanelerinde tutulğan ukrainalı siyasiy mabüslerniñ azat etilmesini talap etip, açlıqqa başlağan edi.
Daa soñra peyda olğan malümatqa köre, Sentsov oktâbrniñ 6-nda açlıqnı toqtatacaq. O, «zornen aşatacaqlar dep, bunı mecburiy adım» dep adlandırğan edi. Amnesty International, zornen aşatma azap ola, dep qayd etti.
Advokat Dmitriy Dinze ve Sentsovnıñ qardaşı Natalya Kaplan mahküm etilgen rejissörniñ cigeri bozula ve büyrekleri işini toqtata bile, dep haber etkenler. Rusiye ekimleriniñ fikirince, Sentsov açlıqtan çıqma esnasına dayanamaması mümkün.
Sentsov ve Aleksandr Kolçenko Rusiye mahsus hizmetleriniñ vekilleri tarafından Qırımda 2014 senesi mayıs ayında, yarımadada terroristik aktlar azırlağanlarında qabaatlanıp tutulğan ediler. 2015 senesi avgust ayında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, 20 yıllıq şiddetli rejim koloniyasına qalmağa mahküm etti. Kolçenkoğa 10 yıl koloniya cezası berildi. Ekisi de qabaatlarını tanımay.
«Memorial» insan aqlarını qorçalav merkezi Sentsov ve Kolçenkonı siyasiy mabüsler cedveline kirsetti. Rusiyede mahküm etilgen Oleg Sentsovnı qurtarmaq çağıruvı ile petitsiya Beyaz Saraynıñ saytında 100 biñden ziyade insan tarafından imzalandı.
