Qırım ve esas Ukraina arasındaki memuriy sıñırda Rusiye sıñırcıları qırımtatar faali ve siyasetşınas Lenora Dülberni tuttı. Bunı Qırımtatar Milliy Qurultayı Merkeziy saylav komissiyasınıñ reisi Zair Smedlâyev Facebook saifesinde bildirdi.
«FSB hadimleri tutıp aldı. «Subetler olğan» odağa alıp ketkenler. Şimdilik tek bu belli», – dedi Smedlâyev.
Qırım.Aqiqat tafsilâtlı malümat almağa tırışa.
Rusiye küç qurulışları vaziyetni izaatlamay.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
