Qırım ve esas Ukraina arasındaki memuriy sıñırda Rusiye uquq qoruyıcıları daa eki qırımtatarı – Lemmar Yunusov ve Mustafa Asabanı tutıp aldı. Bu aqta Qırımtatar Milliy Qurultayı Merkeziy saylay komissiyasınıñ reisi Zair Smedlâyev Qırım.Aqiqatqa bildirdi.
«Ananeviy qorquzuv aktsiyası. İnsanlar Rusiyeden çıqmasın dep yapalar. Sıñırda böyle olacağını tahmin etken edik. Lemmar Yunusov – Qurultay delegatı. Mustafa Asaba – faal, sabıq Qurultay delegatı», – dedi Smedlâyev.
Onıñ aytqanına köre, olar ve qırımtatar milliy areketiniñ faali Nariman Celâlnı bir saattan ziyade (Qırım saatine köre saat 13.40-ta) tutalar.
Bundan evel Smedlâyev, Qırım ve esas Ukraina arasındaki memuriy sıñırda Rusiye uquq qoruyıcıları Lenora Dülberni ve qırımtatar milliy areketiniñ faali Nariman Celâlnı tutıp aldı, dep bildirgen edi. Lenora Dülber çıqarılıp yiberilgen edi.
Rusiye küç hızmetleri bunı izaatlamay.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
