Herson vilâyeti Devlet memuriyetiniñ yolbaşçısı Yuriy Gusev Qırımnıñ memuriy sıñırındaki «Kalançak» keçiş noqtasını ziyaret etip, yañı kiriş-çıqış kontrol noqtasınıñ qurucılıq azırlığını muzakere etti.
Onıñ bildirgenine köre, «Çonğar» keçiş noqtasında bugünden başlap tibbiyet odası ve aphane çalışa. Bu aqta Gusevniñ Facebook saifesinde aytıla.
«Ukraina prezidenti Volodımır Zelenskıynıñ avalesini yerine ketirmek içün yañı kiriş-çıqış kontrol noqtasınıñ qurucılığına yapılacaq azırlıqnı sıñırcılarnen muzakere ettik. Yaqın vaqıtta tibbiyet odasını ve aphane açmağa qarar aldıq. «Çonğar» keçiş noqtasında bugünden başlap aphane ve tibbiy yardım çalışa», – dep aytıla haberde.
İyülniñ 13-nde Herson vilâyeti devlet memuriyetiniñ yañı yolbaşçısı Yuriy Güsev Ukraina prezidenti Volodımır Zelenskıyge «Çonğar» ve «Kalançak» keçiş noqtalarında eki keyfiyetli rejim alanını» noyabrniñ 15-ne qadar donatmağa vade etti. Onıñ aytqanına köre, dekabrniñ 31-ne qadar leyha tolusınen – avtovokzallar ve servis merkezleri ile beraber – yerine ketirilecek.
«Ğromadske», Ukraina Maliye nazirliginiñ malümatına esaslanıp, Qırımnıñ memuriy sıñırındaki «Çonğar» ve «Kalançak» keçiş noqtalarınıñ donatıluvı içün Ukraina ükümetiniñ devlet bücetiniñ yedek fondundan ayırğan aman-aman 106 million ğrıvnâ 2018 senesi qullanılmadı, dep bildirdi. 2019 bücet yılında ise olarnı qullanmaq imkânsız ola.
2018 senesi iyülniñ 4-nde Ukraina ükümeti №584 qararını qabul etti. Oña binaen, devlet bücetiniñ yedek fondundan Qırımnıñ memuriy sıñırındaki «Kalançak» ve «Çonğar» keçiş noqtalarınıñ donatıluvına 105 mln 983 biñ 571 ğrıvnâ ayırıldı.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
