Qırımdaki «Taygan» arslan parkınıñ saibi Oleg Zubkov Nova Kahovkadaki «Kazkova dibrova» ayvanat bağçasından ayvanlarnı çıqarmağanını bildirip, müessise müdiri Yelena Navrotskayanıñ Kahovka gidroelektrostantsiyası patlatılğan soñ suv basuv neticesinde ölgen yüzlernen ayvan aqqında malümatını tasdıqladı.
«Nova Kahovkağa, bu ayvanat bağçasına barmağan edik, olğanını bile edik. Muracaatlar yoq edi, faciağa mania olamadıq ve bu ayvanat bağçasında yüzlernen ayvan öldi. Tek suvda yaldağan quşlar sağ qaldı. Amma Nova Kahovka şeer yolbaşçısı (Rusiye tayin etken Vladimir Leontyev – QA) ne içündir bütün ayvanlar telükesizlikte ve «Tayganğa» çıqarıldı, dep izaat berdi. Bu doğru malümat degil», – dep bildirdi Zubkov YouTube-kanalında.
«Kazkova dibrova» ayvanat bağçasınıñ müdiri Yelena Navrotskaya Rusiye ordusı işğal etken Nova Kahovkada yerli gidroelektrostantsiyanıñ benti yoq etilgen soñ ve suv basuv neticesinde ayvanat bağçasında olğan yüzlernen ayvan öldi, dep bildirdi.
Nova Kahovkanıñ Rusiye şeer yolbaşçısı Vladimir Leontyev iyünniñ 7-nde Nova Kahovkadaki ayvanat bağçasınıñ bütün ayvanları 2022 senesi çıqarılğan edi, dep bildirdi.
Bundan ğayrı, Nova Kahovkadaki Rusiye acele hızmet vekilleriniñ TASS agentligine bildirgenine köre, «Nova Kahovkadaki ayvanat bağçasında Kahovka gidroelektrostantsiyasınıñ patlatıluvı neticesinde suv basuv neticesinde ayvanlar ölgenine dair malümat doğru degil. Şeerde ayvanat bağçası yoq».
İyünniñ 6-nda saba Rusiye Herson vilâyetinde Kahovka suv elektrik stantsiyasını patlattı, dep bildirdi Ukrayina arbiyleri. Ukrayına prezidenti ofisiniñ yolbaşçısı Andriy Yermak Kahovka Kahovka suv elektrik stantsiyası bentiniñ bozuluvı Qırımnı içilgen suvsız qaldıra bile, dep bildirdi.
Ukrayina milliy telükesizlik ve mudafaa şurasınıñ kâtibi Oleksiy Danılov Kahovka Kahovka suv elektrik stantsiyasınıñ patlatıluvı «Rusiye istilâsınıñ yañı basamağı» ola, dep bildirdi.
Ukrayına prezidentiniñ Qırım Muhtar Cumhuriyetindeki vekili Tamila Taşevanıñ fikirince, Kahovka gidroelektrostantsiyasınıñ yoq etilüvi tek Herson içün degil, Ukrayınanıñ cenübi, şu cümleden Qırım içün de felâket ola.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
