Qırım iş adamı, "Taygan" arslanlar parkının saibi Oleg Zubkov Kreml nezaretindeki Qıım akimiyetiniñ başı Sergey Aksönov ile yanvarniñ 23-ünde olğan körüşüvi aqqında aytıp berdi.
"Ebet, bunı ertece yapmağa kerek edi, o alde Moskovağa barmaqnıñ keregi olmaz edi ve meselelerniñ çoqusı konstruktiv ceette baqılır edi. Körüşüvniñ tafsilâtını yarın terif eterim", - yazdı yanvar 23-ünde aqşam içtimaiy ağlarda o.
Bundan evel blogında Zubkov Moskovada Rusiye İqtisadiy inkişaf nazirliginde onıñ ve Qırımnıñ rusiyeli akimiyetiniñ vekili Andrey Rümşinnin iştiragi ile olğan muşavere aqqında yazdı.
Zubkovnıñ aytqanına köre, bu muşavereni bir aydan ziyade azırlay ediler.
"Müim bir vesiqa yaratıldı, şimdi onıñ üzerinde işni bitirip turalar, bütün meraqlanğan şahıslarnen uyğunlaştıralar ve imzalaycaqlar. Bu vesiqa Taygan parkına ve Qırım akimiyetine olğan vaziyetten çıqmağa yardım eter, dep ümüt etem", - dedi Zubkov video roliginde.
Aksönov Zubkov ile körüşüvi aqqında şimdilik haber etmey ve onın malümatını tefsir etmey.
2019 senesi dekabr ayında Rusiye kontrolindeki Qarasuvbazar rayon mahkemesi «Taygan» arslanlar parkınıñ faaliyetini toqtattı. Rusiye mahkeme vekilleri Qırımda parklarnı müürledi, dep bildirdi Zubkov Qırım.Aqiqatqa.
2014 senesi Rusiyeniñ yarımada ilhaqına qoltutqan qırımlı iş adamı Oleg Zubkovnıñ Qırımnıñ Rusiye akimiyetinen zıddiyeti bar. Oleg Zubkov, mal-mülki bulunğan topraq damartılarınıñ vesiqalarını beş yıldan berli resmiyleştirip olamay, dep bildire.
Qırım işğali devamında Zubkov Kreml kontrolindeki Qırım akimiyeti tarafından oña nisbeten para cezaları ve qabaatlavlarnen bağlı tahminen 500 mahkeme oturışuvına bardı.
