Cemaat faali, Ukrayina Silâlı quvetleriniñ pilotsız aviatsiya kompleksleri vzvodınıñ komandanı, ukrayin şairesi ve yazıcısı Oksana Rubanâk "Serbest Qırımğa mektüpler" teşebbüsi çerçivesinde Rusiye akimiyeti tarafından umumiy rejimli koloniyada beş yılğa azatlıqtan marum etilgen Qırım.Aqiqat frilanseri Vladislav Yesipenkonıñ mektübini oqudı.
Mütenasip video Ukrayina prezidentiniñ Qırım Muhtar Cumhuriyetindeki Temsilciliginiñ telegram kanalında derc etildi.
Oksana Rubanâknıñ 2021 senesi mart ayında yazılğan mektübinde Yesipenko Rusiye FSB-siniñ hadimleri tarafından tutulğanı ve işkencege oğratılğanı, şu cümleden qabaatını tanımaq içün elektrik aqımınıñ qullanılğanı aqqında tarif ete.
Vladislav Yesipenko — ukrayin jurnalisti, Qırım.Aqiqatnıñ frilanseridir. Apiske alınğanına qadar içtimaiy ve ekologik meselelerni aydınlattı, qırımlılarnen soravlar keçirdi.
2021 senesi martnıñ 10-nda onı Aqmescitte tuttılar. Rusiye akimiyeti jurnalistni "Ukrayina mahsus hızmetleri menfaatında" malümat toplağanında ve maşnasında "öz başına yapılğan patlayıcı cihaz" saqlağanında qabaatladı.
Neticede Yesipenko 5 yıl umumiy rejimli koloniyada qalmasına ve 110 biñ ruble para cezasına mahküm etildi. Rusiye prokuraturası jurnalist içün 11 yıl apis cezasını istedi. Yesipenkonıñ özü, Rusiye quvetçileri onı işkencege oğratqanını, şu cümleden, tanımalarını istegenleri içün, elektriknen azaplağanını iddia ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
