Aq qorçalayıcı teşkilâtnıñ aytqanına köre, Bağçasaraydaki «dairede teşkerüvden» soñ Rusiye uquq qoruyıcıları siyasiy mabüs Seyran Saliyevniñ anası Zodiye Saliyevanı tuttı. Şimdi onı Aqmescitke alıp keteler.
«Saba 7-de kelgenler. Bir kişi dairege kirdi, çuyu maşinada oturdı. Mahkeme qararı bar», — dep haber ete mühbir.
Aq qorçalayıcı Lutfiye Zudiyevanıñ bildirgenine köre, Saliyevanıñ evine Rusiye FSBsiniñ hadimleri keldi. Olar evini teşkerecek ediler, amma mahkeme qararında yañlış adres yazıldı.
Yaşağan yerine Saliyevanıñ kelini aq qorçalayıcı ve jurnalist Mümine Saliyeva keldi.
«Qarardaki adres yañlış edi. Şunıñ içün içeri kirmediler, mama cep telefonını alğanlar», — dep ayttı o. Zodiye Saliyevanıñ bulunğan yeri ve statusı belli degil.
Saliyev 2017 senesi oktâbr ayında tutuldı. Rusiye uquq qoruyıcıları onı Rusiyede yasaqlanğan «Hizb ut-Tahrir» teşkilâtınıñ faaliyetinen alâqası bar olğanında qabaatladı. 2020 senesi Rusiye mahkemesi Saliyevni 16 yılğa üküm etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
