Qırımnıñ Rusiye Yuqarı mahkemesi «Aluşta» din teşkilâtınıñ azası Zinur Appazovnıñ memuriy apsine qarşı itiraz şikâyetini baqıp, ükümni deñişmesiz qaldırdı. Bu aqta «Qırım birdemligi» cemaat birleşmesi haber ete.
«İmaye şikâyet berdi, birinci derece mahkeme delilleri talil ve tedqiq etildi, istinaf şikâyetlerinde bu bar. Bugün istinaf mahkemesi şikâyetlerimizni qanaatlendirmedi, birinci derece mahkemesiniñ – Aluşta şeer mahkemesiniñ qararını deñiştirmedi. Mence, bu qarar qanunğa uymay, zıt kele», – dep qayd etti advokat Nazim Şeyhmambetov.
Onıñ aytqanına köre, imaye ciddiy protsessual bozuvlarnı qayd etti. Mahkeme qararınıñ temeline uyğun olmağan ekspert keçirgen ekspertiza qoyuldı, hususan halqara qanunğa köre diger madde, talaplar bozuldı.
Şeyhmambetov qayd etkenine köre, Rusiye mahkemesi qulaq asmadı ve imayeniñ delillerine qıymet kesmedi.
«Bu qararnı da anayasa seviyesinde şikâyet etecekmiz, çünki böyle «qıyış» bir şey çoqtan körmedim. «Qıyış» malümat çoq, amma bu uquq, qanun ceetinden pek «qıyış», mahkemege qadar kelmesiniñ aqqı yoq, amma mahkemege keldi ve atta Qırımnıñ Yuqarı mahkemesinde dayandı», – dep qoştı uquqçı.
Noyabrniñ 23-nde saba Qırımda Rusiye uquq qoruyıcıları «Aluşta» musulman din cemiyetiniñ üç azasınıñ evini tintip tuttı. Yusuf Aşirov, cemiyetniñ eki azası Vilen Useinov ve Zinur Appazov aqqında aytıla. Üçü de Yuqarı Şumada (Verhnâya Kutuzovka) yaşay. Aşirov eki künge, Useinov 10 künge, Appazov 5 künge apiske alındı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
