Rusiye tahqiqatı tarafından Zello internet-radiosı vastasınen nefret ve duşmanlıq doğurğanında qabaatlanğan Novıy mir sakini İsmail Ramazanov ve advokatı Aleksey Ladin tahqiqatçı Dmitriy Kosâkinniñ davanı toqtatmaq istemegenine qarşı şikâyet arizasını berdiler. Olar Ramazanovnıñ yaramay bir niyeti olmağanını ve adiseniñ müim olmağanını qayd etti. Bu aqta Radio Svoboda rus hızmetiniñ mühbiri bildire.
Aqmescit rayonınıñ prokuraturası şikâyet arizasını baqmaq içün qabul etkenini tasdıqladı. 2018 senesi noyabrniñ 17-nde cevap berilmeli.
Haber etile ki, tahqiqatçı Ramazanovğa qarşı Rusiye Ceza kodeksiniñ 282-nci maddesi boyunca açılğan davanı qapatmağa istemedi, faqat silânı qanunsız saqlav davasını qapattı.
2018 senesi yanvar ayında FSB hadimleri tintüv keçirip, patronlar tapılğanını bildirgen edi.
Ramazanov köteklengen edi, onıñ aytqanına köre, patronlarnı tintüv keçirgen quvetçiler qoydı.
İsmail Ramazanov 2018 senesi yanvarniñ 23-nde tutulğan edi, Novıy mir köyündeki evinde tintüv keçirilgen edi. Rusiye Tahqiqat komiteti, onı Zello internet-radiosı vastasınen ekstremizm teşviqatında qabaatladı.
İyülniñ 14-nde İsmail Ramazanov SİZOdan çıqtı, çünki bu cinaiy iş boyunca şeklengenler yarım yıldan ziyade nezaret altında qalmay.
Avgustnıñ 2-nde belli oldı ki, Ramazanovğa qarşı cinaiy iş qoşma tahqiqatqa qaytarıldı.
