Ukraina prezidenti Volodımır Zelenskıy yañı yıl hayırlavında ukrain halqını istek, ideal ve qonuşqan tillerine baqmadan, birlik olmasına çağırdı. Bu aqta Azatlıq Radiosı haber ete.
«Pasportımızda doğru ya da yañlış ukrainalı dep qayd etilmegen. Vatanperver, maloross, vatnik ya da banderacı dep yazılmağan. Aq ve vazifeleri olğan Ukraina vatandaşı dep yazılğan. Pek farqlımız. Biz kimmiz? Prezidentni saylağan 73%? Onı tanımağan 25%? Ya da saylavlarğa barmağanlar?», – dep soradı Zelenskıy.
«Qıymetli ukrainalılar! Yañı 2020 yılında epimizge bir-birini ürmet etmemizni tileyim. Sağlam olayıq, bolluq ve tebessüm etmek içün çoq sebep olsun. Er kes yahşı raatlansın, yuquğa toysın, qarardan ziyade aşamasın ve, elbette, saba yengil ve hoş baş aylanuvı olsun. Em de Ukrainanı sevmek bütün ukrainalılarnı sevmek demek olğanını unutmayıq», – dedi Ukraina prezidenti.
Daa evel haber etilgenine köre, qırımlılar Aleksandr Usik, Maşa Yefrosinina ve Jamala Ukraina prezidenti Volodımır Zelenskıynıñ yañı yıl hayırlavında ukrainalılarnı kelgen 2020 yılınen tebrikledi. Yefrosinina «tuvğan Qırımımızğa evge, Ukrainağa qaytmasını» ukraince tiledi.
