Eger Rusiye ordusı Ukrayinada qalsa, bu buzlatılğan çatışmağa çevirilecek ve tekrar istilâ telükesi olacaq. Bu aqta Ukrayina prezidenti Volodımır Zelenskıy ABD-de Ronald Reagan İnstitutında ayttı.
"Eger siz topraq aqqında aytsañız, eñ evelâ insanlarnı ve devletni qurtarmaq kerek olğanını añlamaq kereksiz. Ve biz NATO azası degilmiz, böyle bir şemsiyemiz yoq. Bizge Putinniñ yutquzması kerek. Onıñ bizim toprağımızda bulunmasını istemeymiz, çünki er alda bu buzlatılğan çatışma. Ve o kene istilâ ile kelecek, ve bunı yapacaq — vaqıt meselesidir", — dep ayttı Zelenskıy, Kıyivniñ 1991 senesi sıñırlarındaki topraqlarnı qaytarmaq maqsadı barmı sualine cevap berip.
Zelenskıy, cenkni toqtatmaq içün eñ yahşı yol plan azırlamaq ve kelecek aylar devamında ekinci barışıq sammitini teşkil etmek.
Yanvar ayında mudafaa naziri Rustem Ümerov Ukrayinanıñ strategik maqsadı 1991 senesiniñ sıñırlarına, şu cümleden Donetsk, Lugansk vilâyetleri ve Qırımnıñ memuriy sıñırlarına çıqmaq olğanını bildirdi.
İyün 15-16 künleri İsviçre, yüzden ziyade iştirakçi iştirak etken Global barışıq sammitini qabul etti. Olarnıñ arasında Rusiye ve Çin yoq edi.
80-den ziyade memleket ve dört teşkilât, şu cümleden Avropa Şurası, Avropa komissiyası, Avropa Şurası ve Avropa parlamenti, Global barışıq sammitiniñ yekünlerine dair ortaq beyanatnı desteklediler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
