Ukraina prezidenti olaraq saylanğan Volodımır Zelenskıy müftiler ve musulman din adamlarınen körüşti, dep bildire «Umma» Ukraina musulmanları diniy idaresiniñ müftisi Said İsmagilov Facebookta.
«Volodımır Zelenskıy er keske nevbetnen söz berdi. Men Ukraina Anayasası ve qanunlarında qayd etilgen diniy aq ve serbestlik, musulmanlarnıñ Ukraina birligini ve azatlığını qoruvda faal iştiraki, vatandaş cemiyetiniñ inkişafındaki müsbet rolümiz, faal hayriye faaliyet, dinlerara dialog ve diger dünyabaqışı olğan ukrainalılarnen işbirligine açıq olmaqnıñ müim olğanını qayd ettim. Ayder Rustemovnen (Qırım Muhtar Cumhuriyeti musulmanları diniy idaresiniñ müftisi – QA) beraber işğal etilgen Qırım ve Donbasta musulmanlar apiske alınğanını ve aqları ve serbestlikleri bozulğanını tarif ettik», – dep bildirdi Ukraina müftisi.
Zelenskıy müftiler ve musulman din adamlarınen keçirilgen körüşüv neticelerini daa izaatlamadı.
Aprelniñ 30-nda Ukraina prezidenti olaraq saylanğan Zelenskıy Ukraina Pravoslav kilsesiniñ yolbaşçısı Epifaniy ile körüşti.
Daa soñra Zelenskıy Ukraina pravoslav kilsesiniñ (Moskva patriarhatı) mitropoliti Onufriy ile körüşti.
Merkeziy saylav komissiyasınıñ malümatına köre, 13 541 528 saylayıcı Volodımır Zelenskıyge rey berdi. Bu aprelniñ 21-nde keçirilgen ekinci tur saylayıcılarınıñ 73.22%-ı ola.
