Ukrayina prezidenti Volodımır Zelenskıy musulmanlarnı eñ müim musulman bayramlarından biri olğan Qurban bayramınen hayırlayaraq, Qırım ve Qırımlı siyasiy mabüslerni añdı.
"Bu bayram er bir qorantağa işnçlı barışıq, bereket ve ahlâq ketirsin. Öz tarafından Ukrayina, bir çoq aile Qurban Bayramını kerçek telükesizlik içinde qayd ete bilmesi içün çoq şey yapa... Ukrayin Qırımımıznı da hatırlaymız. Tamam ondan 2014 senesi Rusiyeniñ Ukrayinağa qarşı cenki başlandı. Ukrayina ve halqımızğa qol tutmaq içün elinden kelgenini yapqan, Rusiye işğaline qarşı çıqqan ve Rusiye esirliginden adamlarımıznı qaytarmağa yardım etken er keske minnetdarmız. Rusiyeniñ Qırım siyasiy mabüslerini hatırlaymız ve olarnı evge, Ukrayinağa qaytarmağa tırışamız. Bütün serbest dünya bugün azatlıqtan marum etilgen insanlarnı unutmamaq kerek", — dep yazdı Zelenskıy içtimaiy ağlardaki saifesinde.
Qurban bayramı islâmda eñ müim bayramlardan biri ola, o, Allahqa sadıqlıqnı ve qurban bermege azırlıqnı ifadeley. O, Ramazan ayınıñ bitmesinden 70-inci künü qayd etile ve Hac ile bağlıdır. Bu künde bayram namazı qılına, qurban çalına. Qırımtatarlar içün Qurban bayramı tek diniy degil de, cemiyetni birleştirgen ve çoq asırlıq ananelerni saqlağan medeniy bir vaqiadır