Media malümatına köre, olarnıñ körüşüvinden soñ planlaştırılğan Trump ve Zelenskıynıñ matbuat konferentsiyası lâğu etildi.
AP yazğanına köre, Zelenskıy Trumpnen üyle aşını aşaycaq edi, soñra taraflar matbuat konferentsiyası vaqtında faydalı qazıntılar añlaşmasını imzalaycaq ediler.
«Bunıñ yerine Zelenskıynıñ zırhlı arabası Trumpnıñ yazğanlarından soñ ğarbiy qanat qapusına keldi», – dep yaza agentlik.
Laf ABD prezidentiniñ içtimaiy ağlarda yazğanları aqqında kete, anda o, Zelenskıy Oval odada ABDge ürmetsizlik kösterdi, ve «barışıqqa azır olğanda qayta bile», dep yaza.
Soñra X içtimaiy ağındaki saifesinde Volodımır Zelenskıy Amerikağa ve Trumpnıñ özüne ziyaret içün teşekkürler bildirdi. «Teşekkürler, Amerika, yardımıñ içün, bu ziyaret içün. Prezident, Kongress ve Amerika halqına teşekkürler. Ukrayinağa adaletli ve uzun barışıq kerek, ve biz bunıñ içün çalışamız», – dep yazdı o.
Ukrayina prezidenti Volodımır Zelenskıy Oval odada Donald Trump ve vitse-prezident James David Vance ile Rusiyeniñ Ukrayinağa qarşı cenki mevzusında qavğa etti. O, telükesizlik kefaletleri olmasa, ateşkes teklifini qabul etmeycek, dep ayttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
