Ukrayina prezidenti Volodımır Zelenskıy yanvarniñ 19-nda aqşam muracaatında Rusiye Ukrayinağa qarşı daa bir kütleviy darbe azırlay dep bildirdi ve vatandaşlarnı ava telükesi signalını körmemezlikke urmamağa çağırdı.
"Bu künleri ve ileride pek diqqatlı olmaq kerek – Rusiye darbege azırlandı, kütleviy darbege ve bu darbeni endirmek içün vaqıt bekley. Lütfen, bütün ava telükelerine qulaq asıñız, ve er bir vilâyette tez areket etmege ve insanlarğa qoltutmağa azırlıq olmalı", – dep ayttı Zelenskıy.
Bugün ükümetniñ matbuat hızmeti energetika naziri Denis Şmığal Atom energiyası halqara agentliginiñ baş müdiri Rafael Grossinen laf etip, "rusiyelilerniñ energetika infrastrukturasına qarşı azırlağan daa bir kütleviy darbe ve atom stantsiyalarına hızmet etken obyekt ve hatlarğa qarşı ola bilecek darbeler aqqında bildirdi", dep haber etti.
Prezident Volodımır Zelenskıy Rusiye Ukrayinanıñ atom elektrostantsiyalarına zarar ketirmege tırışa, dep bildirdi. Baş istihbarat idaresiniñ malümatına köre, Rusiye Ukrayinanı cenkni bitirecek teslim talaplarını imzalamasına mecbur etmek içün atom elektrik stantsiyalarınıñ ast stantsiyalarına darbe endirüv imkânlarını baqa.
Rusiyeniñ Ukrayinanıñ energetik sistemasına qarşı kütleviy darbelerinden soñ fevqulâde vaziyet rejimi çalışa, eñ zor vaziyet – Kyivde ve Kyiv vilâyetinde. Yanvarniñ 9-nda Rusiye darbesinden soñ elektrik energiyası söndürile. Kyiv şeer yolbaşçısı Vitaliy Klıçko bildirdi ki, Rusiyeniñ bu ücümi şeerniñ kritik infrastrukturası içün eñ ağır oldı. O, vaziyet dört yıl içinde eñ zor ola, dep qayd etti.
