Temsilcilik bugünki tintüvlerni böyle izaatladı. Qanunsız tintüvler ve faallerniñ tutuluvı takbih etile ve din adamlarınıñ taqip etilüviniñ toqtatılması talap etile.
«Halqara toplulıqnı işğal etilgen Qırımda musulmanlarnıñ muntazam sürette taqip etilüvini takbih etmesine çağıramız. İşğalcilerniñ Ukrayınağa ait yarımadada yeri yoq – tek Qırımnıñ işğalden azat etilüvi insan aqlarınıñ bozuluvını ve vatandaşlarımıznıñ taqip etilüvini toqtata bile», – dep bildirdi Ukrayına prezidentiniñ Qırım Muhtar Cumhuriyetindeki temsilciligi.
Fevralniñ 29-nda saba Eski Qırımda ve Seyit Eli (Juravki) köyünde Rusiye uquq qoruyıcıları dört qırımtatarı Lenur Yakubov, İzet Sayfullin, İdris Yurdamov ve Şevket Kiyamovnıñ evlerinde tintüv keçirdi. Eski Qırım camisi de tintildi.
Tintüvlerden soñ Eski Qırımlı faal ve iş adamı Lenur Yakubov ve «Eski Qırım» mustaqil musulman cemiyetiniñ imamı İzet Sayfullin tutuldı. İdris Yurdamov ve Şevket Kiyamovnı uquq qoruyıcılar evlerinde qaldırdı. Olarğa qarşı memuriy protokollar tizilmedi.
Daa soñra Sayfullin polis bölüginden yiberildi. Oña qarşı «qanunsız missionerlik faaliyeti» içün memuriy protokol tizildi. Belli olğanına köre, Lenur Yakubovğa qarşı da memuriy protokol tizildi, onı 14 künge apiske alğanlar.
Polis bölüginden çıqqan Sayfullin «halq imamı», yani Eski Qırım camilerinden birinde halq saylağan imam ola, dep ayttı. Rusiye uquq qoruyıcılarınıñ malümatın köre, Sayfullinden yanvarniñ 19-nda Cuma namazını qıldırğanı içün şikâyet etildi. «Qanunsız missionerlik faaliyetini kerçekleştirgen» eken, çünki caminiñ vesiqaları bar, anda cami imamı olaraq başqa adam qayd etilgen.
Bundan ğayrı, Rusiye qurğan İslâm-Terek rayon mahkemesiniñ binası ögünde Rusiye uquq qoruyıcıları mahkeme ögünde diñleyicilerni dağıta, «Qırım birdemliginiñ» mühbiri Ali Seytablayevni tuttı. Seytablayev arbiy komissarlıqqa celpname berilgen soñ yiberildi.
2023 senesi noyabrniñ 23-nde Rusiye uquq qoruyıcıları «Aluşta» musulman din cemiyetiniñ üç azasınıñ evini tintip tuttı. Yusuf Aşirov, cemiyetniñ eki azası Vilen Useinov ve Zinur Appazov aqqında aytıla. Aşirov eki künge, Useinov 10 künge, Appazov ise 5 künge apiske alındı.
Daa soñra Rusiye uquq qoruyıcıları «Aluşta» musulman din cemiyetiniñ reisi Abdul Gafarovnıñ evinde tintüv keçirdi, bundan soñ «Ekstremizm ile küreş merkeziniñ» hadimleri Abdul Gafarovnı Aluştadaki Rusiye polisi bölügine alıp ketti. Oña qarşı RF Memuriy cinayetler qanunnamesiniñ 20.29 maddesine istinaden memuriy protokol tizildi (Federal ekstremist materiallar cedveline kirsetilgen ekstremist materiallarnıñ kütleviy darqatıluvı, em de olarnı kütleviy darqatıluv maqsadınen azırlav ya da saqlav).
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
