Ukrayına prezidenti Volodımır Zelenskıy Washingtonğa yol aldı, dep haber ete CNN telekanalı menbalarına esaslanıp.
«Zelenskıy Washingtonğa kete, dep bildirdi eki farqlı menba», – dep yaza telekanal.
Ukrayına prezidenti çarşenbe künü Amerika paytahtını ziyaret etip, ABD Kongressiniñ umumiy toplaşuvında çıqışta buluna bilecegi salı künü aqşam belli oldı. Bu ziyaret telükesizlik sebeplerinden kerçekleştirilemeycek de, dep aytqan ediler.
Zelenskıynıñ ABD prezidenti Joe Biden ile körüşüvi planlaştırıla. Amerika ve Ukrayına ükümetleriniñ resmiy vekilleri izaat bermekten vazgeçti.
Salı künü Vekiller palatasınıñ spikeri Nancy Pelosi Palata azalarına çarşenbe künü mektüp yollap, «mahsus tedbir keçirmek içün» Kapitoliyge kelmege rica etti.
Bu afta Kongress Ukrayınağa ve ABD NATO ittifaqdaşlarına 47 milliardlıq yardımnı tasdıqlamaq kerek. Ukrayına prezidentiniñ ziyareti ABD ve Ukrayına arasındaki sıqı işbirliginiñ şaatlığı olacaq. CNN malümatına köre, bu afta Washington Ukrayınağa Patriot zenit raketa kompleksleriniñ berilüvi aqqında ilân ete bile.
Washington ziyareti Volodımır Zelenskıynıñ Ukrayınağa qarşı büyük Rusiye istilâsı başlağanından ilk çetel ziyareti ola bile.
Ukrayına akimiyetiniñ malümatına köre, dekabrniñ 20-nde Ukrayına prezidenti Volodımır Zelenskıy Donetsk vilâyetindeki Bahmutta Ukrayına arbiyleri ile körüşti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
