Ukraina prezidenti Volodımır Zelenskıy Türkiye prezidenti Recep Tayyip Erdoğan ile telefonda laf etip, Qara deñizdeki telükesizlik ve Rusiye apsinde tutulğan ukrainalılarnı azat etüv meselelerini muzakere ettiler, dep bildire noyabrniñ 17-nde Ukraina devlet yolbaşçısınıñ resmiy saytı.
«Ukraina prezidenti Rusiye tarafından qanunsız tutulğan Ukraina vatandaşlarınıñ azat etilüv meselesine diqqat ayırdı. Volodımır Zelenskıy ve Recep Tayyip Erdoğan regiondaki telükesizlik vaziyeti, em de Qara deñizde telükesizlikni quvetleştirüv teşebbüslerinen bağlı fikirlerini ayttı. Prezidentler mudafaa saasında işbirligi meselesini muzakere etti. Taraflar, strategik ortaqlıq bugün eki memleketniñ silâlı quvetlerini quvetleştire, dep ayttı. Uçaq qurucılığı ve arbiy-deñiz quvetleriniñ inkişafı saalarında bir sıra müim leyhanıñ yerine ketirilgeni ve böyle işbirligini terenleştirüv istiqbali qayd etildi», – dep aytıla haberde.
Matbuat hızmetiniñ malümatına köre, Ukraina prezidenti Türkiyeniñ Ukraina topraq bütünligi ve suverenitetine qoltutqanına ve yañı halqara mehanizm olğan «Qırım platformasınıñ» işine faal qoşuluvına yüksek qıymet kesti.
Zelenskıy ve Erdoğan 2022 senesi fevral ayında Kyivde Yüksek seviyeli strategik şuranıñ 10-uncı toplaşuvını keçirmege añlaştı.
Bundan evel berilgen malümatqa köre, Zelenskıy Büyük Britaniya Mudafaa nazirinen Ukraina flotunıñ inkişaf leyhalarını muzakere etti.
Ukraina Arbiy-deñiz quvetleri ABD, Türkiye Cumhuriyeti ve Romaniyanıñ arbiy gemilerinen talimler keçirdi. Ukraina arbiyleriniñ malümatına köre, ABD 6-ncı flotunıñ flagmanı Mount Whitney idare gemisi celp etildi. Amerika Arbiy-deñiz quvetleriniñ aviatsiyası da celp etildi – patrulnıy samolet P-8 Poseidon patrul uçağı ve vertolet. Talimde ekisi Ukraina Arbiy-deñiz quvetlerine ait «Slavânsk» patrul kateri ve «Yuriy Olefirenko» orta desant gemisi olğan 7 gemi iştirak etti.
Ukraina arbiyleri, talimniñ maqsadı «NATO standartlarına uyğun çoq milletli taktik gruppası erkânında işbirligini baquv ve alyans flotları ile uyğunlıq seviyesini arttıruv ola», dep ayttı.
Rusiye prezidenti Vladimir Putin ABD ve NATO ortaqlarınıñ Qara deñizdeki talimlerni «ciddiy bir mesele» dep adlandıra. Rusiye Tış işler naziri Sergey Lavrovnıñ fikirince, NATOnıñ Qara deñizdeki talimleri «ABD ve ortaqlarınıñ Rusiyeni tutuv siyasetini arttıruvnen bağlı». Rusiye Mudafaa nazirligi Amerika gemileriniñ Qara deñizde bulunmasını «provokatsiya» dep adlandırdı.
Ukraina Tış işler naziri Dmıtro Kuleba, Qırım Rusiye tarafından işğal etilgen soñ, Qara deñizde daa çoq NATO küçleri olmalı, dep israr etken edi.