Qışta Ukrayınanıñ esas vazifesi – «küç kösterip, Rusiyege teşebbüsni öz qoluna almağa imkân bermemek», dep ayttı Ukrayına lideri Volodımır Zelenskıy Yuqarı baş komandan Stavkası toplaşuvı neticesinde.
«Stavka toplaşuvını keçirdim. Er vaqıt kibi, Baş komandan, yöneliş komandanları operativ vaziyet aqqında esabat berdi. Kupânsk, Liman ve bütün Donetsk yönelişleri, cenüp. Asker ve komandanlarğa sabitlik ve cesaret içün minnetdarım. Devletimizniñ vazifesi – şimdi, qışta, ne qadar qıyın olsa da – küç kösterip, duşmağa teşebbüsni qoluna almağa, pekitmege imkân bermemek. Areketleri bunı Ukrayına içün temin etken er keske minnetdarım – adım atmamızğa imkân bereler», – dedi o, video muracaatında.
Ukrayına Silâlı quvetleriniñ Baş ştabı bildirgenine köre, Ukrayına şarqı ve cenübinde operativ vaziyet qıyın qala, bir künge 77 uruş çatışması oldı. Ştab malümatına köre, Ukrayına arbiyleri altı yönelişte Rusiye ücümlerini keri qaytardı, eñ çoq Avdiyıvka yönelişinde – 32.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
