Ukrayına energetik sistemasında söndürüvler qısqartılsa da, qıtlıq devam ete, dep bildirdi Ukrayına prezidenti Volodımır Zelenskıy.
Siyasetçi, bayram raatlıq künleri olğan dekabrniñ 24-ü ve 25-inde turğun elektrik temin etip olğan energetik müssiselerniñ hadimlerine teşekkür bildirdi.
«Ebet, qıtlıq bar. Söndürüvler devam ete. Bu aqşam Ukrayınanıñ farqlı regionlarında tahminen 9 mln kişi elektriksiz qala. Amma söndürüv sayısı ve devamlığı eksile. Bu neticeni temin etken er kes sağ olsun», – dep qayd etti o.
Zelenskıy, bazarertesi künü energetika ve infrastruktura vaziyetinen bağlı toplaşuvnı memurlarnen keçirdi, dep tarif etti:
«Kelecek yılğa azırlanamız – ve tek qış aylarına degil. Çezilmesi kerek olğan telükeler bar. Atılacaq adımlar bar. Ve devlet olarnı mıtlaqa atacaq».
Oktâbrniñ 10-nda Rusiye uçucısız ve raketalarnı qullanıp, Ukrayına energetik sistemasına qarşı kütleviy darbe endirip başladı. Bu vaqıt devamında sistemanıñ büyük qısmı çalışmaz alğa keldi, Ukrayınada em planğa köre, em acele bir şekilde elektrik energiyası söndürile.
Dekabrniñ 19-na keçer gecesi Rusiye ordusı kene Ukrayınağa ücüm etti. Umumen, Ukrayına Silâlı quvetleriniñ Ava quvetleri malümatına köre, tahminen 35 silâ tapıldı, 30-ı tüşürildi. Hususan ücümler Kyiv ve Kyiv vilâyetine qarşı yapıldı.
Ukrayına prezidenti ofisiniñ yolbaşçı muavini Mıhaylo Podolâk uçucısız ve raketalarnı işlep çıqarğan İran zavodlarını yoq etmege ve olarnı Rusiyege ketirgenlerni apiske almağa çağırdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
