Ukrayina prezidenti Volodımır Zelenskıy yanvarniñ 22-nde Davosta Dünya iqtisadiyat forumında çıqışta bulunıp, Ukrayina, Rusiye ve ABD ilk üç taraflı muzakerelerini ilân etti.
Onıñ aytqanına köre, olar yanvarniñ 23-24-nde Birleşken Arap Emirliklerinde "tehnik seviyede" ötkerilecek.
"Ruslar uzlaşuvlarğa azır olmalı. Tek Ukrayina degil, er kes azır olmalı. Neticesi ne olur baqacaqmız", – dedi o.
Zelenskıynıñ qayd etkenine köre, dünya ABD prezidentiniñ yardımı olmasa, barışıq olmaz dep, Avropa Birligini tevqif etilgen Rusiye aktivlerini Ukrayinağa yardım içün qullanmağa istemegeninde qabaatladı. O, keçken sene Davostaki sözüni Avropa özüni özü qorçalamalı dep bitirgenini hatırlattı, amma bir yılda bir şey deñişmedi, dep qayd etti Ukrayina lideri.
Zelenskıy bir qaç misal ketirip, Avropalı siyasetçilerniñ ABD qararlarını beklegenini ayttı, özleri ise bir adım atmay, dep qayd etti. Onıñ aytqanına köre, bütün diqqat Grenlandiyağa keçti.
"Er kes ABD meraqı biter dep ümüt ete ve beklep oturalar. İrandaki narazılıqlar da böyle oldı", – dep qayd etti Ukrayina prezidenti Venesuelanı örnek kösterip.
Donald Trumpnıñ mahsus vekili Steve Witkoff bugünge Moskvada planlaştırılğan Vladimir Putin ile körüşüvden soñ Amerika eyyeti Birleşken Arap Emirliklerine yol alacaq, dep ayttı. Onıñ qayd etkenine köre, yanvarniñ 21-nde aqşam keç saatqa qadar o ve Amerika eyyetiniñ diger azaları Ukrayina eyyetinen munaqaşa yaptı. Hususan Ukrayina iqtisadiyatınıñ ğayrıdan tiklenmesi muzakere etildi, Witkoff serbest iqtisadiyat alanını hatırlattı.
Witkoff çezilmegen tek bir mesele qala, dep qoştı – laf topraqlardaki kontrol aqqında ketedir.
Zelenskıynıñ çıqışı ögüne ABD prezidenti Donald Trump ile körüşüvi oldı, tahminen bir saat devam etti ve jurnalistlersiz keçti. Trump "pek yahşı" keçti dep, Rusiye prezidenti Vladimir Putinge cenk bitmeli, dep söz ayttı.
Financial Times gazetası Zelenskıy Trumpnı Ukrayinağa qoltutuvda qoşma mecburiyetler almasına iqna etmege tırıştı, dep haber etti. Vesiqalar Davosta sammit ögüne Amerika memurlarınen tasdıqlandı, lâkin muzakeresi bitmedi ve imzalanmadı, dep yazdı gazeta.
