Ukrayına ordusına arbiy qarşı ücümi içün çoqça vaqıt kere, dep ayttı Ukrayına prezidenti Volodımır Zelenskıy. Bu aqtaBBC haber ete.
O, arbiyler ğarbiy ortaqlarımızdan daa «bazı şeylerge» muhtaclar, dep qayd etti – hususan «ardı-sıra kelgen» zırhlı tehnika.
«Elimizde olğanlarnen ilerilep, muvafaqiyetli ola bilemiz. Amma çoq şeyni ğayıp ete bilemiz. Men bunı uyğun körmeyim. Beklemek kerek. Daa biraz vaqıt kerek», – dep bildire Zelenskıynıñ aytqanlarını neşir.
Soñki aftaları Ukrayınanıñ qarşı ücümi aqqında daa çoq aytalar. Vaqtı ve yeri aqqında bir şey belli degil. Bazıları Kyivniñ maqsadı Donbas, digerleri ise Qırım ola, dep aytalar.
Ukrayına Mudafaa nazirligi Baş istihbarat idaresiniñ reberi Kırılo Budanov Ukrayına Silâlı quvetleriniñ qarşı ücümine azırlıq «planğa köre kete», amma yerine ketirüv planlarını aydınlatmaycaq, dep bildirgen edi.
Mudafaa naziri Öleksiy Reznikov qarşı ücümden beklevler «pek büyük», dep qayd etken edi. Onıñ aytqanına köre, çoqu insan «büyük bir şey bekley», amma böyle beklevler «duyğu peşmanlığınıñ» sebebi ola bile.
Qırımnıñ Rusiye yolbaşçısı Sergey Aksenov Ukrayına fortifikatsiya ve mudafaa sayesinde yarımadanı işğalden qurtarıp olamaycaq, dep ayta.
Mayısnıñ 10-nda Azatlıq Radiosınıñ leyhası olğan Qırım.Aqiqat jurnalistleri 2014 senesi Rusiye tarafından işğal etilgen Qırım yarımadasınıñ Rusiye Federatsiyasınıñ 223 çalışqan, muvaffaq ve qapalı arbiy obyektleriniñ haritasını derc etti.
Obyektler arasında – infrastrukturalı arbiy uçaq alanları, gemi ve katerlerniñ yerleri, silâ anbarları, arbiy şeerçikler, arbiy bölükler, idare noqta ve ştabları, arbiy tehnika parkları ve ava mudafaa nevbetçilik yerleri, poligon ve oquv merkezleri, bazı arbiy-sanayı kompleksiniñ müessiseleri.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
