Ukrayına Silâlı quvetleri Qırımğa qadar barğanda Rusiye prezidenti Vladimir Putin muzakere keçirmege isteycek. Bu tahminlerini Ukrayına prezidenti Volodımır Zelenskıy ABC News intervyüsında seslendirdi.
Neşir jurnalistleri qayd etkenine köre, Zelenskıy Washington Post neşiriniñ Ukrayına memurları Merkeziy istihbarat idaresiniñ müdiri William Burnske Kyiv ziyareti vaqtında «qarşı ücümniñ maqsadı Qırım sıñırına kelip, Rusiye diktatorını muzakere başlatmağa mecbur etmek» dep aytqanını inkâr etmedi.
Jurnalistniñ Putinniñ muzakerege zorlamaq «mümkünmi» sualine Zelenskıy «ğayet mantıqlı bir tahmin», dep ayttı.
«Bu añlaşılğan, mantıqlı bir ritorika, Ukrayına vaqtınca işğal etilgen Qırımnıñ memuriy sıñırına kelse, Putin medeniy dünyanen dialog qıdırmağa mecbur olacaqtır, çünki zayıf olacaq», – dedi Ukrayına prezidenti.
Fevralniñ 24-nde Ukrayına prezidenti Volodımır Zelenskıy memleket Qırımnı işğalden azat etmege azırlana, dep bildirdi.
Prezident ofisiniñ yolbaşçı mesleatçısı Mıhaylo Podolâk Qırım.Aqiqatqa intervyü berip, Ukrayına «yarımadanı beş-yed ayda qaytarır», dep bildirdi. Onıñ aytqanına köre, Rusiye Federatsiyasınıñ büyük istilâsı yarımadanı şimdi işğalden qurtarmaq içün yañı fırsatlar peyda etti.
ABD devlet kâtibiniñ muavini Viktoriya Nuladn Amerika Birleşken Devletleri Ukrayinanıñ işğal etilgen Qırımdaki Rusiye arbiy obyektlerine darbe endirmesine qoltuta, dep bildirdi.
Bıltır dekabr ayınıñ soñunda Ukrayina arbiy istihbarat yolbaşçısı Kırılo Budanov Ukrayına Qırımnı em küç, em diplomatiyanen keri alacaq, dep bildirgen edi.
Ukrayına Silâlı quvetleriniñ baş komandanı Valeriy Zalujnıy Qırımnı işğalden azat etüv imkânlarına qıymet kesip, birinciden Zaporijjâ vilâyetiniñ Melitopol şeerini kontrol altına almaq kerek, dep bildirgen edi.
Avropada ABD ordusınıñ sabıq komandanı Ben Hoces Ukrayina Qırımnı 2023 senesi yaznıñ soñuna qadar azat etecek, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
