Ukrayına prezidenti Volodımır Zelenskıy memleketniñ mudafaa nazirini deñiştirmek niyetini tasdıqladı. Oleksiy Reznikov yerini Devlet mülki fondunıñ yolbaşçısı Rustem Umerov almalı.
«Oleksiy Reznikov büyük cenkniñ 550 kününden berli bu vazifede buluna. Mence, nazirniñ em arbiylernen, em umumen cemiyetnen munasebetleriniñ yañı şekilleri kerek», – dep ayttı Zelenskıy öz qararı aqqında. Bu qarar müessisedeki ve nazirniñ emrinde olmağan arbiy komissarlıqlar sistemasındaki qabarcılıq qavğalarından soñ seslendirildi.
41 yaşında Umerov Özbekistannıñ Bulungur şeerinde Qırımdan sürgün etilgen qırımtatar qorantasında dünyağa keldi. Bir qaç yatırım fondunıñ idare müdiri edi. 2019 senesi Ukrayına Yuqarı Radasına saylandı. 2022 senesi büyük istilâdan soñ Ukrayına-Rusiye muzakere gruppasına kirgen edi. O yıl Devlet mülki fondunıñ yolbaşçısı oldı.
Forbes mecmuasınıñ ukrayın muarririyeti bildirgenine köre, Reznikov istifadan soñ Ukrayınanıñ Büyük Britaniya elçisi olacaq. Neşirniñ menbası bunı Zelenskıy tasdıqladı, dep bildire. Resmiy bir malümat daa yoq edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
