Ukrayina prezidenti Volodımır Zelenskıy Donald Trumpnı ABD saylavlarında «tesirli ğalebe» ile tebrikledi.
«Men prezident Trumpnıñ dünya işlerinde «quvet yolunen barışıq» usulına qoltutam. Bu printsip Ukrayinada adaletli barışıqnı kerçekten yaqınlaştıracaq. Ümüt etem ki, biz onı beraber kerçekleştirirmiz. Prezident Trumpnıñ qararlı yolbaşçılığı altında küçlü Amerika Birleşken Devletleri devrini bekleymiz. Biz ABDde Ukrayinağa eki taraflı küçlü yardımnıñ devam etmesine işanamız», – dep yazdı o, X içtimaiy ağında.
Onıñ aytqanına köre, Ukrayina eki memleketke de fayda ketirecek «siyasiy ve iqtisadiy işbirliginiñ» inkişaf etmesini istey.
Zelenskıyden ğayrı, Trumpnı Frenkistan prezident Emmanüel Makron ve Britaniya baş naziri Kir Starmer tebriklegenler.
Reyler daa sayılsa da, Donald Trump prezident saylavlarında ğalebe qazanğanını ilân etti.
Episi olıp, soñki malümatqa köre, Donald Trump saylav kollegiyasında 267 rey ala, demokratlarnıñ namzeti vitse-prezident Kamala Harris ise 224 rey ala.
Saylav kollegiyasınıñ 270 reyine yetken birinci namzet memleketniñ 47-nci prezidenti olacaq.
Noyabrniñ 5-nde olıp keçken prezident saylavları Rusiyeniñ Ukrayina cenki, Yaqın Şarqtaki arbiy çatışmalarda ve diger dünya meselelerinde ciddiy tesirli olacaqtır. Rey berüvniñ Avropağa tesiriniñ emiyetini bütün qıtadaki bir çoq közetüv noqtalarında körmek mümkün, anda saylavlarnı seyir etip, neticeleri tış siyaset içün ne olacağını tüşüne ediler.
Harris, prezident Joe Bidenniñ Ukrayinağa yardım siyasetini devam ettirecegini bildirdi ve Rusiyeniñ yeñilgenini körmege istegenini açıqtan-açıq bildirgen edi. Trump ABDniñ Ukrayinağa yardımını şübhege oğratıp, Avropa Rusiyeniñ ücümine qarşı Kyivge yardım etmekniñ ağırlığını öz boynuna almaq kerekligini ayttı ve NATOnıñ kelecegini şübhege oğrattı.
Bu küreşte kim ğalebe qazansa da, bu tarihiy bir saylav olğanını inkâr etmege kerekmey.
78 yaşında Trump inauguratsiya vaqtında eñ yaşlı prezident ve cinaiy qabaatlavlarğa oğrağan birinci yañı prezident olacaq. 60 yaşında Harris birinci qadın, tek ekinci qara tenli ve Cenübiy Asiya asıllı birinci prezident olacaq.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
