Ukrayina prezidenti Volodımır Zelenskıy ABD lideri Donald Trumpnı Ukrayinanı ziyaret etmesine çağırdı. O, aprelniñ 4-nde Rusiyeniñ Krıvıy Riğ ücüminden soñ bunı CBS News telekanalına bergen intervyüsında ayttı.
Zelenskıy bildirgenine köre, o, Trump «mında olğanlarnı añlasın» dep, onı Ukrayinada körmege memnün olur.
«Biz fikriñizni ürmet etemiz, amma, lütfen, er angi qarar, muzakere planlarından evel kelip, insan, vatandaş, arbiy, hastahane, kilselerni köriñiz… Kelip baqıñız, soñra ise cenkni nasıl etip bitirmek mümkün planınen areket etersiñiz. Kim olğanlarını añlarsıñız. Putinniñ yapqanlarını añlarsıñız», – dedi Zelenskıy.
ABD prezidenti Donald Trump Rusiyeniñ Ukrayinağa qarşı cenkini bitirüv muzakereleri «bir qarar kete», dep bildirdi. Bu aqta o, Air Force One uçağında jurnalistlerge aytıp, «ya areket, ya da sessizlik vaqtı yaqınlaşa», dep qoştı.
Soñki aftaları Ukrayina ve ABD, Rusiye ve ABD arasında bir qaç körüşüv ve telefon subeti oldı.
Martnıñ 11-nde ABD vekilleri Ukrayinadan 30 künlik ateşkes razılığını aldı. Putin bu ğayeni red etmedi, amma şartlarını qoydı.
ABD mahsus vekili Steven Witkoff aprelniñ 11-nde Rusiye prezidenti Vladimir Putinnen körüşti. Muzakereler dört saattan çoq devam etti.
Körüşüv Sankt-Peterburgdaki prezident kütüphanesinde oldı. Beyaz Saray Witkoffnıñ ziyaretini tasdıqlap, Ukrayinada ateşkes ve barışıq añlaşması tizilmesinde diplomatik ğayretlerniñ bir qısmı ola, dep qayd etken edi.
Rusiye prezidentiniñ matbuat kâtibi Dmitriy Peskov taraflar «Ukrayina meselesiniñ çeşit taraflarını» muzakere etecek, Kreml ise «Rusiyeniñ fikri ve qayğıruvlarınıñ esas noqtalarını» doğrudan-doğru ABD prezidenti Donald Trumpqa yetkizmege niyetlene, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
